Беллингем фаолиятидаги энг оғир аламли лаҳзани эслади

Мадриднинг «Реал» клуби ярим ҳимоячиси Жуд Беллингем фаолиятида ҳануз хотирасидан ўчмайотган энг аламли эпизод ҳақида гапирди. Бу ҳақда euro-football.ru хабар беради.

Англиялик футболчи Дортмунднинг «Боруссия»си сафида Бундеслига чемпионлигини сўнгги турда қўлдан бой берганини эслади. «Майнс» устидан ғалаба «асаларилар»ни чемпион қиларди, бироқ баҳс 2:2 ҳисобида дуранг якунланди ва олтин медаллар яна «Бавария»га насиб этди.

«Ҳали ҳам ортимдан қувиб юрадиган омадсизликми? «Боруссия» билан мавсумнинг сўнгги кунида бой берилган чемпионлик. Эслатганингиз учун раҳмат», — деб келтиради Madrid Zone ярим ҳимоячининг сўзларини.

Беллингем 2023 йил ёзида, Германиядаги ўша драматик якундон кўп ўтмай, «Боруссия»дан «Реал»га кўчиб ўтганди.