Джикия «Антальяспор»ни тарк этиши мумкинлиги айтилди

Туркиянинг «Антальяспор» клубида тўп сураётган россиялик ҳимоячи Георгий Джикия келажаги борасида унинг агенти Малик Арутюнов изоҳ берди. Бу ҳақда euro-football.ru хабар беради.

Агентнинг сўзларига кўра, футболчи маош кечикаётгани сабабли норози ва шу боис Россия Премьер-лигаси жамоаларидан тушиши мумкин бўлган таклифларни кўриб чиқмоқда. Қайд этилишича, маошлар ноябрдан бери ушланиб қолган, қолган масалаларда эса Джикия Туркиядаги шароитлардан мамнун.

32 ёшли ҳимоячи «Антальяспор» сафига ўтган ёзда келиб қўшилган ва турк клуби билан икки йиллик шартнома имзолаган.

Жорий мавсум Туркия Суперлигасида Джикия 12 та учрашувда майдонга тушиб, 2 та гол урди ҳамда 3 та сариқ карточка олди.