Беллингем фаолиятидаги энг оғир аламини айтиб берди

Мадриднинг «Реал» клуби ярим ҳимоячиси Жуд Беллингем фаолиятида ҳануз хотирасидан ўчмайдиган энг оғриқли эпизодни эслаб ўтди. Бу ҳақда euro-football.ru хабар беради.

Англиялик футболчи Дортмунднинг «Боруссия»сида тўп сурган пайтида Бундеслигада сўнгги турда қўлдан кетган чемпионликни тилга олди. «Майнц» устидан ғалаба «арилар»ни чемпион қилиши мумкин эди, бироқ ўйин 2:2 ҳисобида дуранг якунланиб, олтин медаллар яна «Бавария»га насиб этди.

«Мени ҳозиргача қувиб келаётган омадсизлик? Мавсумнинг энг сўнгги кунида «Боруссия» билан бой берилган чемпионлик. Эслатганингиз учун раҳмат», — дея футболчининг сўзларини Madrid Zone келтиради.

Беллингем 2023 йил ёзида, Германиядаги ўша драматик якундан кўп ўтмай, «Боруссия»дан «Реал»га кўчиб ўтганди.