Франческо Тотти «Рома» билан музокаралар борлигини тасдиқлади

Афсонавий ҳужумчи Франческо Тотти яна бир бор «Рома» билан алоқалари ҳақидаги гап-сўзларга муносабат билдирди. Аввалроқ у клубга қайтиб, техник директор лавозимини эгаллаши мумкинлиги ҳақида хабарлар тарқалган эди. Бу ҳақда euro-football.ru хабар беради.

«Рома» — менинг уйим, ҳозир у ерда бўлмасам ҳам. Клубнинг қандай йўлдан кетаётганидан мамнунман. Сўнгги пайтлар кўп миш-мишлар юрди. Бу рост: биз гаплашяпмиз, тафсилотларни муҳокама қиляпмиз ва ҳамма учун қайси вариант маъқул эканини ҳал қиляпмиз. Умид қиламанки, тез орада бу масалани тартибга соламиз», — деди Тотти Sky Sport Italia’га.

Тотти футболчилик фаолиятини 2017 йилда якунлаган. Шундан кейин у бир неча йил «Рома» тизимида менежер сифатида ишлаган.

Шунингдек, аввалроқ жамоа бош мураббийи Жан Пьеро Гасперини ҳазил тариқасида Тоттини ҳатто майдонга туширишга ҳам тайёрлигини айтганди.