Арбелоа Винисиус атрофидаги можарога муносабат билдирди

Мадриднинг «Реал» жамоаси бош мураббийи Альваро Арбелоа Чемпионлар лигасида «Бенфика»га қарши баҳсда юзага келган ирқчилик можароси ҳақида фикр билдирди. Бу ҳақда euro-football.ru хабар беради.

Учрашув давомида Винисиус Жуниор ҳакамга «Бенфика» вингери Жанлука Престианни томонидан ўзига нисбатан ирқчилик ҳақорати айтилганини маълум қилди. Бразилиялик футболчи ҳатто майдонни тарк этишни ҳам ўйлаб кўрди, бироқ якунда ўйинни давом эттирди.

«Буни Престианнининг ўзидан сўранг. Нима бўлганини ҳамма кўрди. У оғзини футболкаси билан ёпди, демак жавобни ундан изланг», — деди Арбелоа Amazon Prime'га берган интервьюсида.

Мураббий Винисиусни тўлиқ қўллаб-қувватлашини таъкидлади: «Албатта, биз Винини тўлиқ қўллаб-қувватлаймиз. Ирқчиликка қарши курашиш керак, бу айниқса футболчиларга тааллуқли», — дея қўшимча қилди у.

Можароли вазиятдан бироз олдин Винисиус гол уриб улгурган ва ўша гол ўйинда ягона бўлиб қолган. «Бенфика» томони вакиллари, жумладан Жозе Моуринью, ҳужумчининг голни нишонлашини ҳурматсизлик сифатида баҳолаган.