Кейн Гeрд Мюллер натижасини такрорлаб, рекордлар қаторга қўшилди

Бундеслиганинг сўнгги турида «Бавария» Франкфуртнинг «Айнтрахт» жамоасини 3:2 ҳисобида мағлуб этди. Учрашув қаҳрамонларидан бири Гарри Кейн бўлиб, инглиз ҳужумчиси икки гол урди. Бу ҳақда euro-football.ru хабар беради.

Кейн бунинг билан кетма-кет учинчи ўйинда дубл қайд этди: аввал «Хоффенхайм»га, ундан кейин «Вердер»га ҳам икки мартадан гол киритганди. 2023 йилдан бери Бундеслигада тўп сураётган футболчи фаолиятида бундай серияни учинчи бор такрорлади.

Натижада Кейн «Бавария»нинг 60–70-йиллардаги афсонавий форварди Гeрд Мюллер эришган кўрсаткичга етиб олди. Клуб тарихида эса бундай серияни фаолияти давомида тўрт марта қайд этган ягона футболчи — ҳозир «Барселона» сафида ўйнаётган Роберт Левандовски ҳисобланади.