Кудряшов Джикиянинг тезроқ «Анталяспор» асосий таркибига қайтишини истади

Россия терма жамоасининг собиқ футболчиси Фёдор Кудряшов Туркияда тўп сураётган Георгий Джикиянинг ҳозирги ҳолати ҳақида фикр билдирди. Бу ҳақда euro-football.ru хабар беради.

Мутахассиснинг айтишича, у «Анталяспор» марказий ҳимоячиси атрофидаги вазиятни доимий кузатиб боради. 32 ёшли футболчи сўнгги пайтларда майдонга тушмай қўйди — унинг агенти таъкидлашича, жамоа бош мураббийи Джикия ҳозирча энг яхши спорт формасида эмас деб ҳисоблайди.

«У ўйнадими-йўқми, кузатаман ва жуда истайманки, у имкони қадар тезроқ асосий таркибга қайтсин. У билан боғландимми? Фақат клубга ўтган пайтда гаплашганмиз, кейин эса йўқ», — дея Кудряшовнинг сўзларини Metaratings.ru келтиради.

Джикия «Анталяспор» сафида 2025 йил ёзидан буён ўйнамоқда. Жорий мавсумда «Спартак»нинг собиқ футболчиси 13 учрашувда майдонга тушиб, 2 та гол урди.