Кейн мавсумдаги голлари бўйича шахсий натижасини такрорлади
Германия Бундеслигасида 24-тур учрашувлари давом этмоқда. Турнинг марказий баҳсида Дортмунднинг «Боруссия» жамоаси Мюнхеннинг «Бавария»сини қабул қилди ва меҳмонлар 3:2 ҳисобида зафар қучди. «Бавария» сафидаги иккита голни англиялик ҳужумчи Гарри Кейн ўз ҳисобига ёздириб қўйди. Бу ҳақда euro-football.ru хабар беради.
Натижада Кейннинг жорий мавсумдаги жами голлари 44 тага етди — барча турнирлар ҳисобга олинган. Бу кўрсаткичга у атиги 37 ўйинда эришди. Қизиғи, 2023/2024 йилги мавсумда ҳам у Мюнхендаги илк йилида 44 гол урган, бироқ ўшанда бунга 45 учрашув керак бўлганди.
Ҳозир Кейннинг бу натижани янгилаб юбориш имконияти жуда юқори. У яқин ҳафталарда, катта эҳтимол билан март ойидаёқ, янги шахсий рекордини расмийлаштириб қўйиши кутилмоқда.