Дортмунд «Боруссия»сининг 16 ўйинлик мағлубиятсиз серияси якунланди

Германия Бундеслигасининг 24-тури доирасида бир қатор учрашувлар бўлиб ўтди. Дортмунднинг «Боруссия»си кучли қаршилик кўрсатганига қарамай, Мюнхеннинг «Бавария»сига 2:3 ҳисобида имкониятни бой берди. Бу ҳақда euro-football.ru хабар беради.

Натижада «Боруссия»нинг чемпионатдаги мағлубиятсиз юриши тўхтади. Учрашувгача бу серия Европанинг топ-5 лигалари орасида давом этаётган энг узун кўрсаткич бўлиб, 16 та ўйинни ташкил этганди.

Қизиқ жиҳати шундаки, мазкур серия ҳам айнан «Бавария»га қарши ўйиндан кейин бошланган эди: 7-турда мюнхенликлар 2:1 ҳисобида ғалаба қозонган, шундан сўнг дортмундликлар кечаги оқшомгача ютқазмай келганди.

Кейинги турда «асалари» 7-март куни «Кёльн» майдонига сафар қилади.