АҚШ Эронни нефть даромадларидан маҳрум қилмоқчи
Вашингтон Эрон нефтини тўлиқ ўзлаштириш ва шу орқали Теҳронни асосий даромад манбаидан маҳрум қилиш ниятида эканлигини маълум қилди. Бу ҳақда Американинг энергетика устунлиги бўйича миллий кенгаши директори Жаррод Эйген Фох Неwс телеканали эфирида айтиб ўтди.
Журналистларнинг Яқин Шарқдаги зиддиятлар нефт нархига қандай таъсир қилиши ҳақидаги саволига жавоб бераркан, Эйген Ҳўрмуз бўғозидаги муаммолардан хавотирланмаслик кераклигини таъкидлади. Унинг сўзларига кўра, АҚШ Эрон раҳбарияти қўлидан барча нефтни тортиб олишни режалаштирмоқда.
Шу ҳафта давомида Эрон дунёдаги энг муҳим нефт транзити йўналишларидан бири ҳисобланган Ҳўрмуз бўғози амалда ёпилганини эълон қилди. Ушбу тақиқ барча турдаги кемаларга, хусусан, тижорат ва нефт ташувчи танкерларга ҳам тегишли бўлди. Натижада стратегик аҳамиятга эга бўлган йўлакда ҳаракат деярли тўхтаб қолди, айрим кемалар эса ракета зарбаларига нишон бўлмоқда.
Соҳа мутахассисларининг фикрича, нефт оқимларини назорат қилиш учун бораётган кураш минтақадаги геосиёсий зиддиятларнинг асосий қисмига айланиб улгурган. Форс кўрфазидан амалга ошириладиган нефт экспортидаги ҳар қандай узилиш жаҳон энергетика бозорлари ҳамда ёқилғи нархларига ўзининг жиддий таъсирини кўрсатиши шубҳасиз.