«Рома» ирландиялик ҳужумчини сотиб олишдан воз кечди

Италиянинг "Roma" клуби ўз таркибини кучайтириш мақсадида ижарага олган ирландиялик ҳужумчи Эван Фергюсон билан хайрлашишга қарор қилди. Ўтган ёзда ўзбекистонлик ҳужумчи Элдор Шомуродовни Туркиянинг "Istanbul Bashakshehir" клубига ижарага бериб, унинг ўрнига "Brighton"дан иқтидорли форвардни таклиф қилган римликлар, бу трансфердан кутилган натижани ололмади. Футболчининг Италиядаги фаолияти омадсиз кечди ва у жамоа ўйинига тўлиқ мослаша олмади.

Статистикага кўра, 21 ёшли ҳужумчи "Roma" сафида барча турнирлар доирасида 22 та учрашувда майдонга тушиб, атиги 5 та гол ва 2 та голли узатмага муаллифлик қилди. Вазиятни янада мураккаблаштирган омил эса футболчининг жиддий жароҳат олгани бўлди. Тўпиғидан олган оғир жароҳати сабабли Фергюсон мавсумнинг қолган қисмини ўтказиб юбориши аниқ бўлди. "Football Italia" нашрининг хабар беришича, футболчи операция қилиниши учун Буюк Британияга йўл олади.

Эслатиб ўтамиз, Фергюсон фаолиятининг бошида Англия Премер лигасида жуда ёрқин ўйинлари билан эътиборни тортган эди. Бироқ, уни доимий равишда таъқиб қилаётган жароҳатлар, жумладан 2023-2024 йилги мавсумдаги хочсимон боғламларнинг узилиши ва жорий мавсум бошидаги соғлиқ билан боғлиқ муаммолар унинг ўсишига тўсқинлик қилди. Шу сабабли, "Roma" раҳбарияти "Brighton" билан тузилган шартномадаги футболчини тўлиқ сотиб олиш ҳуқуқидан фойдаланмасликка қарор қилди. Мавсум якунлангач, ирландиялик футболчи ўзининг асосий клуби Англияга қайтариб юборилади.