Қатар сайёҳлар учун бепул меҳмонхонада қолиш дастурини тўхтатиб қўйишини маълум қилди
Қатар расмийлари мамлакатдаги сайёҳлар учун бепул меҳмонхонада жойлашиш дастурини тўхтатиб қўйишини маълум қилди. Шу муносабат билан Қатардаги Россия элчихонаси сайёҳларга 15 мартгача мамлакатни тарк этиш ёки меҳмонхоналарда қолиш муддатини узайтириш зарурлигини эслатган, деб хабар беради DW.
Элчихона маълумотларига кўра, россиялик сайёҳлар учун Qatar Airways авиакомпаниясининг 14 март куни соат 11:40 да Москвага учадиган рейси орқали мамлакатни тарк этиш тавсия этилган.
Бундан ташқари, сайёҳлар қуруқлик орқали “Абу Самра” чегара ўтказиш пункти орқали жўнаб кетиш имконига эга. Кейинчалик улар Саудия Арабистони ёки Бирлашган Араб Амирликлари орқали ҳаво йўли билан сафарларини давом эттириши мумкин.
Эслатиб ўтамиз, Қатар меҳмонхоналарда бепул яшаш ва овқатланиш дастурини Исроил–АҚШ ва Эрон ўртасидаги можаролар бошланганидан сўнг жорий этган эди. Ушбу дастур тўхтатилиши сайёҳлар учун янги тартиб ва имкониятларни белгилайди.