Паступілі ў продаж квіткі на фінал Кубка Беларусі па футболе

Квіткі на фінал Кубка Беларусі сезона-2021/22 паступілі ў продаж. Вырашальны матч за кубак пройдзе 21 траўня ў Менску на стадыёне „Дынама”.

Гульня паміж барысаўскім БАТЭ і футбольным клубам „Гомель” пачнецца а 19-й гадзіне. Кошт квіткоў складзе ад 4 да 8 рублёў.

Арына Сабаленка выйшла ў паўфінал турніру ВТА-1000 у Рыме

Арына Сабаленка (8-ы нумар рэйтынг ВТА) выйшла ў паўфінал турніру ВТА-1000 у італьянскім Рыме. Беларуска ў чвэрцьфінале перайграла прадстаўніцу ЗША Аманду Анісімаву (32 ВТА) — 4:6, 6:3, 6:2.

Беларуска Юлія Гатоўка (213-ы нумар рэйтынгу ВТА) выбыла ў чвэрцьфінале турніру ў французскім Сен-Гідэне. Юлія саступіла ўкраінцы Дар’і Снігур (143 ВТА) — 6:7 (3:7), 2:6.

Новым намеснікам міністра спорту стаў Алег Андрэйчык

Аляксандр Лукашэнка абнавіў склад кіраўніцтва некаторых міністэрстваў. У прыватнасці месца намесніка міністра спорту і турызму заняў Алег Андрэйчык, які з 30 лістапада 2021 года працаваў у міністэрстве на пасадзе начальніка ўпраўлення спорту. З 2013 года і да лістапада 2021 года Андрэйчык кіраваў упраўленнем спорту і турызму Гарадзенскага аблвыканкама. Як паведамляў партал Hrodna.life пасля прызначэння Андрэйчыка на пасаду ў Міністэрстве спорту, пасля выбараў 2020 года, калі з’явіўся праўладны ліст спартоўцаў, некаторыя атлеты ўбачылі свае прозвішчы пад лістом, хаця нічога не падпісвалі. Іншыя спартоўцы прама казалі пра ціск з боку спартовых службоўцаў і пагрозы звальнення, калі яны не падпішуць ліст. Менавіта Андрэйчыка тады называлі адказным за ціск на спартоўцаў.

У Фінляндыі стартаваў чэмпіянат свету па хакеі

13 мая ў фінскіх Хельсінкі і Тампэрэ стартаваў чэмпіянат свету па хакеі. Групавы раунд сусветнага першынства пройдзе з 13 па 24 мая, 26 мая адбудуцца чвэрцьфінальныя сустрэчы, 28 мая будуць згуляны паўфіналы, а 29 мая адбудуцца матч за трэцяе месца і фінал турніру. У групе „А” гуляюць зборныя Канады, Швейцарыі, Германіі, Славакіі, Даніі, Казахстана, Італіі і Францыі. У групе „В” — каманды Фінляндыі, ЗША, Швецыі, Чэхіі, Латвіі, Нарвегіі, Вялікабрытаніі і Аўстрыі. Зборныя Беларусі і Расеі па рашэнні ІІХФ прапускаюць усе міжнародныя турніры на роўні нацыянальных і клубных каманд у 2022 годзе.

Беларускае Радыё Рацыя

Фота: pressball.by

Artykuł Паступілі ў продаж квіткі на фінал Кубка Беларусі па футболе pochodzi z serwisu БЕЛАРУСКАЕ РАДЫЁ РАЦЫЯ.