Яшел Үзән районында яшәүче ир-ат 5 яшьлек авыру баланы үтергән
Яшел Үзәндә 5 яшьлек инвалид кыз баланы үтерүчене 17 елга ирегеннән мәхрүм иттеләр. Ул баланың башына 8 тапкыр суккан. Бу турыда «Татарстан 24» каналы Россия Тикшерү комитетының Татарстан буенча Тикшерү идарәсенә сылтама белән хәбәр итте.
Тикшерү ачыклаганча, 2022 елның маенда Васильево бистәсендәге фатирда 38 яшьлек ир-ат 5 яшьлек инвалид кызны кыйный. Бала имгәнә һәм һәлак була.
«Үтерү 16 майга каршы төндә була. Җинаятьтә шикләнелүче ир-ат баланың тормыш өчен мөһим булган урыннарына 8 тапкыр суга. Бала үлә. Ир-ат гаебен танымый», – ди Татарстан прокуратурасының җинаять-суд идарәсенең дәүләт гаепләүчеләре бүлегенең өлкән прокуроры Ольга Зарипова.
Үтерү факты буенча җинаять эше ачыла. Соңрак ачыкланганча, 9 майда бергәләп хәмер эчеп утырганда, ул бергә яши торган хатыны һәм аның апасына да үтерү белән яный.
Суд ир-атны 17 елга ирегеннән мәхрүм итә. Ул зыян күрүчегә мораль зыян өчен 2 млн сум түләргә тиеш була.
«Татар-информ» хәбәр иткәнчә, хөкем ителгән Сергей Макаров мәрхүмә кызның анасының танышы була.
Әлеге эштә Макаров фаҗигагә кадәр 1 атна алдан мәрхүмә кызның анасына да һөҗүм итүе турында эпизод бар, диелә хәбәрдә.