АЙГА КЫРЫН КАРАМА
27 июнь (шимбә). Рамазан аеның 10нчы көне. 12нче Ай тәүлеге. Ай Чаян йолдызлыгында, 15.07 сәгатьтә калка, 0.26 сәгатьтә бата. 2нче фаза. Көн озынлыгы 17.33 сәгать.
Шәфкать, сабырлык, мәхәббәт энергиясенә бай көн. Сәламәтлеккә игътибарлы булырга, йөрәкне киеренкелектән сакларга кирәк. Ашкайнату әгъзалары, кан әйләнеше системасы зәгыйфь. Дарулар яхшы үзләштерелә. 27, 28 июньдә дару үләннәре җыю, бүлмә гөлләрен күчереп утырту, редис һәм укроп чәчү уңай нәтиҗә бирә.
Атеросклероздан – лимон
2 аш кашыгы лимон согы, 1 аш кашыгы аптекадан алынган валериана төнәтмәсе, 3 аш кашыгы бал, 250 миллилитр кайнатып суытылган суны яхшылап болгатып, караңгы урында 5-6 көн төнәтәләр, көненә 1 тапкыр, ашарга 30 минут кала, 30-40 тамчы эчәләр. 1 айдан соң 2 атна ял итәләр, аннары тагын ай буена эчәләр. 3 ай дәваланганнан соң кан басымы сикерешләре, баш авырту бетә, йөрәк авыртудан туктый.
28 июнь (якшәмбе). Рамазан аеның 11нче көне. 13нче Ай тәүлеге. Ай Чаян йолдызлыгында, 16.15 сәгатьтә калка, 0.51 сәгатьтә бата. 2нче фаза. Көн озынлыгы 17.32 сәгать.
Үзгәрешләр көне. Үткәннәр турында уйланып, нәтиҗәләр ясау яхшы. Ач торырга ярамый – теләсә нәрсә ашарга була. Аралашу, белем алу файдалы. Йөрәк, тире, кан тамырлары зәгыйфь. Чикләвек ашау файдалы.
Тәмле дә, сихәтле дә (1)
Чәй кебек пешерелгән рәйхан салкын тигәндә булыша, бу үсемлек – табигый антибиотик. Кан басымы түбән булганда, бәбрия (розмарин) чәйнәү файдалы. Чабыр үләне (тимьян) дәрт һәм энергия өсти, аны чәйгә дә, итле ризыкларга да кушарга була. Бөтнек эчәклектәге ялкынсынуны баса, невроздан, йокысызлыктан дәвалый. Мәтрүшкә эчәклектә газлар ясалуны киметә, үт бүленеп чыгуны арттыра, күрем алдыннан эч авыртуны баса.
29 июнь (дүшәмбе). Рамазан аеның 12нче көне. 14нче Ай тәүлеге. Ай Укчы йолдызлыгында, 17.21 сәгатьтә калка, 1.22 сәгатьтә бата. 2нче фаза. Көн озынлыгы 17.30 сәгать.
Иң әһәмиятле эшкә тотыну өчен уңайлы көн. Бүген башланган эш бик яхшы тәмамланачак. Теләсә нинди вак-төяккә игътибарлы булу сорала. Эчәклек һәм тирене чистарту уңай нәтиҗә бирә. Ашказаны асты бизе зәгыйфь. Балан, фасоль, борчак, арпа ашау файдалы. 29, 30 июньдә күпьеллык суган чәчәргә була.
Тәмле дә, сихәтле дә ( 2)
Укроп ашказаны-эчәк трактының эшен җайга сала, ябыктыра. Петрушка йөрәк мускулы өчен кирәкле калийга һәм марганецка бай, бәвел куу үзлегенә ия булганга, шешенүне бетерә, ябыгуга булыша. Сельдерей хатын-кыз организмы өчен аеруча файдалы, чөнки күкәйлекләр һәм башка эндокрин бизләр эшен җайга сала, шлаклардан чистарта. Йокысызлык интектергәндә яисә кәеф начарайганда, тархун чәйнәп йоту булыша.
30 июнь (сишәмбе). Рамазан аеның 13нче көне. 15нче Ай тәүлеге. Ай Укчы йолдызлыгында, 18.24 сәгатьтә калка, 2.00 сәгатьтә бата. 2нче фаза. Көн озынлыгы 17.30 сәгать.
Авыр энергетикалы көн. Бүген кеше үз нәфесенең теләк һәм коткыларына бигрәк тә бирешүчән.Тыелгысыз хисләр күңелсез вакыйгаларга китерергә мөмкин. Тәэсирләнүчән кешеләргә аеруча кыен. Алма, кәбестә, сарымсак ашарга ярамый, балан, мүк җиләге, кычыткан ашау файдалы.
Укроп һәм шалфей
Климакс интектергәндә, 1 аш кашыгы укроп орлыгын 2 стакан кайнар суда 10 минут төнәтәләр дә, сөзеп, иртән һәм кичен 1әр стакан эчәләр. Дәва курсы – 2 атна. Аннары 2 атна буе шалфей төнәтмәсе белән дәваланалар (1 аш кашыгы үләнне 2 стакан суда чәй кебек пешерәләр дә, 3кә бүлеп көн буена эчеп бетерәләр). Аннары тагын укроп төнәтмәсенә күчәләр.
1 июль (чәршәмбе). Рамазан аеның 14нче көне. 16нчы Ай тәүлеге. Ай Кәҗәмөгез йолдызлыгында, 19.21 сәгатьтә калка, 2.48 сәгатьтә бата. 2нче фаза. Көн озынлыгы 17.29 сәгать.
Тыныч, иҗади, уңышлы көн. Һәрнәрсәдә гармониягә омтылу, җан тынычлыгын саклау мөһим. Дулкынландыргыч очрашулар булырга мөмкин. Килешүләр төзү уңай нәтиҗә бирә. Кан авырулары кискенләшә. Беркемгә дә үпкә сакларга ярамый.
Прополислы май
Ашказаны җәрәхәтен дәвалау өчен, 500 грамм атланмайны каймак куелыгында булганчы эретәләр дә, шуңа 50-60 грамм уылган прополис кушып болгаталар, салкынча җирдә 1 атна тоткач, суыткычта саклыйлар, көненә 3 тапкыр, ашар алдыннан, 1әр чәй кашыгы кабалар.
2 июль (пәнҗешәмбе). Рамазан аеның 15нче көне. 17нче Ай тәүлеге. Ай Кәҗәмөгез йолдызлыгында, 20.10 сәгатьтә калка, 3.46 сәгатьтә бата. 7 сәгать 22 минуттан тулы Ай. Көн озынлыгы 17.27 сәгать.
Мәхәббәт, иҗат, яшәү шатлыгы көне. Бернәрсә дә планлаштырмыйча, теләгән нәрсәләрне генә эшләү уңай нәтиҗәгә китерә. Нерв һәм эндокрин системаларга, күзләргә игътибарлырак булу сорала. Үпкәләшкән кешеләр белән дуслашыр вакыт. Яшелчәләрне күбрәк ашау файдалы.
Чәчәге дә файдалы
Күздә конъюнктивит булганда, бер уч кура җиләге чәчәген 1 стакан кайнар суда, яхшылап төреп, ярты сәгать төнәтәләр дә, сөзәләр, мамык тампонны шул төнәтмәдә чылатып, күзләргә куеп, 20-30 минут ятып торалар.
3 июль (җомга). Рамазан аеның 16нчы көне. 18нче Ай тәүлеге. Ай Сукояр йолдызлыгында, 20.51 сәгатьтә калка, 4.54 сәгатьтә бата. 3нче фаза. Көн озынлыгы 17.25 сәгать.
Алдашу, ялганга бай көн. Бизләр системасы, бил, бөерләр, тире, сукыр эчәк зәгыйфь. Мунчага бару, массаж ясату, ач тору, төрле дәвалану чараларын куллану файдалы. Кәеф төшәргә мөмкин.
Кыздырылган сыр
500 грамм сыр, 200 грамм он, чирек стакан сөт, 100 грамм сохари вагы, 2-3 йомырка, тәменчә тоз һәм борыч, кыздырыр өчен үсемлек мае кирәк. Сырны калынлыгы 1,5 сантиметрлы, озынлыгы 5 сантиметрлы кисәкләргә бүләләр. Йомырка, сөт, тәмләткечләр, онны кушып туглыйлар да, шуңа сыр таякчыкларын манып алып, сохари вагында әвәлиләр, кызган майда тиз генә кыздырып алалар.