Ֆրենսիս Ֆորդ Կոպոլան շնորհավորել է SOAD-ին

Ս.թ. հոկտեմբերի 21-ին Հոլիվուդում Փարաջանով-Վարդանով ինստիտուտը մրցանակ կհանձնի SOAD-ին՝ 2015 թվականի Wake Up the Souls շրջագայության միջոցով արդարության վերականգմանը նպաստելու համար:

Այդ առիթով Ֆրենսիս Ֆորդ Կոպոլան նամակ է հղել ինստիտուտին, որում ասված է.

«Ցանկանում եմ շնորհավորել System of a Down-ին՝ Սերգեյ Փարաջանովի եւ Միխայիլ Վարդանովի անվան մրցանակին արժանանալու համար: Ես հիանում եմ այդ կինոգործիչների աշխատանքով: Նաեւ շատ հաճելի է տեղեկանալ, որ խումբը պատրաստակամություն է հայտնել օգնել վերականգնել Վարդանովի «Փարաջանով. Վերջին գարունը» ֆիլմը, որը ստեղծվել էր արգելքների պայմաններում եւ ապացուցում է, որ արվեստի ուժը կարող է հաղթահարել ցանկացած սահմանափակումներ: Բոլորին կոչ եմ անում միանալ այս նախաձեռնությանը»:

2014 թվականին Սերգեյ Փարաջանովի «Նռան գույնը» ֆիլմի վերականգման համար Փարաջանով-Վարդանով ինստիտուտի մրցանակին էր արժանացել The Film Foundation/World Cinema Project-ը: Հաստատության անունից մրցանակը ստացել էր ամերիկացի կինոռեժիսոր Մարտին Սկորսեզեն, որը եւ ներկայացրել էր վերականգնված ֆիլմը Նյու Յորքի 52-րդ կինոփառատոնում 2014 թվականի հոկտեմբերի 2-ին: