Татьяна Ефремовага «Татарстанның атказанган артисты» исеме бирелде
Җырчы Татьяна Ефремова «Татарстан Республикасының атказанган артисты» исеменә лаек булды. Мактаулы бүләкне Татарстан Республикасы Рәисе Рөстәм Миңнеханов «Питрау» республика керәшен мәдәнияте бәйрәмендә тантаналы рәвештә тапшырды.
Татьяна Ефремова социаль челтәрләрендәге шәхси битендә тамашачыларына һәм республика җитәкчелегенә рәхмәт белдерде.
Татарстан Республикасының атказанган артисты. 2008 елда беренче тапкыр сәхнәгә халык җыры белән чыкканда һәм алга таба Идел буе халыклары музыкасын саклау һәм популярлаштыру белән шөгыльләнергә уйлаганда, бу – минем тормышым эше булыр, дип уйламаган идем.
Казан дәүләт консерваториясендә, Казан мәдәният институтында югары белем алып, үз юнәлешемдә инде профессиональ дәрәҗәдә эшлим. Әлеге юлда мине үз халкыма һәм аның бай музыкаль мирасына булган зур мәхәббәт алга этәрде, аны тыңлаучыларга җиткерергә теләдем.
19 июль көнне «Питрау» республика керәшен мәдәнияте бәйрәмендә Татарстан Республикасы Рәисе Рөстәм Миңнеханов тантаналы рәвештә «Татарстан Республикасының атказанган артисты» дигән мактаулы исемне бирде. Мәдәният өлкәсендә күпьеллык эшемне югары бәяләгәннәре өчен, республика җитәкчелегенә рәхмәт белдерәм!
Бу бүләк – гомуми хезмәт нәтиҗәсе. Һәр укытучыма, һәр тамашачыга, һәр тыңлаучыга, бу еллар дәвамында миңа ярдәм иткән һәркемгә рәхмәт. Сез минем иҗат юлымның төрле мизгелләрендә янәшәдә булдыгыз, мин сезнең белән бу шатлыкны уртаклашуыма чиксез шатмын.
Әлеге дәрәҗәле исем һәм зур рәхмәт хисе белән юлыбызны дәвам итәбез! Алга! Алга! Алга! – дип язган җырчы үзенең шәхси битендә.