1 гыйнварда нинди законнар үз көченә керә?
2026 елның 1 гыйнварыннан Россиядә гражданнар тормышының төрле өлкәләренә кагылачак берничә үзгәреш үз көченә керә. Бу турыда РЕН ТВ яза.
Минималь хезмәт хакы артачак. МРОТ 27 093 сумга кадәр күтәрелә.
Хәрби реформа ел әйләнәсе чакырылыш кертүне күздә тота. Хәрби хезмәткә алу өчен ел дәвамында чакырылыш системасына күчү планлаштырыла. Бу – армияне даими рәвештә тулыландырырга һәм аның куелган бурычларны үтәүгә әзерлеген арттырырга мөмкинлек бирәчәк.
Иминият пенсияләре 7,6 процентка индексацияләнә. Бу – пенсионерларның матди хәлен яхшыртачак һәм аларның финанс тотрыклылыгын тәэмин итәчәк.
Балага 1,5 яшь тулганчы карау вакыты рәсми рәвештә әти-әнинең иминият стажына кертеләчәк. Бу – балалар тәрбияләү чорында да кирәкле хезмәт стажын җыярга мөмкинлек бирәчәк.
Салым системасында керемнәре чикләнгән гаиләләр өчен физик затларның кеременә салымның бер өлешен узган салым чоры өчен кире кайтару каралган.
Төбәкләргә авыр һәм хроник авырулар белән интеккән пациентларны дәвалау өчен өстәмә финанс ярдәме күрсәтеләчәк, диелә хәбәрдә.