Украина хавфсизлик хизмати учоқни уриб туширган "Бук"ни ташиган одам қўлга олинганини билдирди
Украина хавфсизлик хизмати 2014 йили Малайзияга қарашли “Боинг” самолётини уриб туширгани гумон қилинаётган “Бук” зенит-ракета комплексини Украина ҳудудига ташиб келтирган шахсни қўлга олди.
Бу ҳақда Украина хавфсизлик хизмати Бош тергов бошқармаси бошлиғи Виталий Маяков баёнот бергани тўғрисида "Украинские новости" агентлиги хабар қилди.
Маяковга кўра, қўлга олинган шахс “Бук” комплексини Донецк шаҳрида ташиган одамдир. Тергов маълумотларига қараганда, комплекс Донецк шаҳрига Россия ҳудудидан олиб келинган. Хавфсизлик хизмати исми эълон қилинмаётган шахсни унинг мобил телефонига ёзилиб қолган видео ёрдамида ушлаганини билдирди. Айтилишича, гумон қилинаётган шахс Украина-Россия чегасидаги назорат-ўтказиш пунктида қўлга олинган. Бироқ унинг қачон қўлга олингани очиқланмади.
Украина устида Malaysia Airlines ширкатига қарашли MH17 учоғи отиб туширилиши оқибатида ҳалок бўлган йўловчиларнинг оила аъзолари ҳамда улар яшаган давлатлар элчихоналари 5 йил олдин содир бўлган фожиани хотирламоқда.
MH17 рейси билан парвоз қилаётган учоқ 2014 йилнинг 17 июлида уруш зонаси устида, Украина ҳукумати бошқарувида бўлмаган ҳудудда “Бук” ракетаси билан уриб туширилган.
Фожиа 298 нафар одам, жумладан, 80 нафар ёш бола умрига зомин бўлди.
193 фуқаросини йўқотган Нидерландияда хотира маросимлари 16 июль куни бошланди. Шу куни Нидерландияда фожиа бўйича конференция ўтказилди.
MH17 ҳалокатини ўрганиб чиққан Қўшма тергов гуруҳи учоқни уриб туширишда фойдаланилган “Бук” ракетаси Россиядан олиб киритилганини аниқлаган.
Москва 2014 йилнинг мартида Украинанинг Қрим минтақасини аннексия қилиб олганидан бери Украина шарқида россияпараст айирмачиларни қўллаб келади.
Россия MH17 фожиасига алоқасини рад этиб, Украина ҳамда АҚШ Марказий разведка бошқармасини айблаб келади.