Коляскадагы баланы подъездга алып кереп баручы хатынны ток сугып үтергән
1 июньдә Мәскәүдә 66 яшьлек хатын ток сугудан үлгән. Бу турыда «Московский комсомолец» яза.
Моңа кадәр биредә яшәүчеләр электр үткәргечне ташлап киткән эшчеләрдән зарланган булган инде.
Мәрхүмә хатын нәни оныгы белән урамда йөри, аннары өйгә кайтып килә. Бала коляскада була. Подъезд янында ул күрше ир-атны очрата, күрше колясканы алып керү өчен тимер пандусны куярга тәкъдим итә, хатын ярдәмнән баш тарта, үзе алып кермәкче була.
Берничә минуттан ир-ат кычкырган тавыш ишетә, подъездга йөгереп керә. Коляска әйләнеп капланган, бала коляска астында ята. Металл пандус янында баланың әбисе дә ята.
Ачыкланганча, пенсионер хатынны ток суккан, һәм ул урында ук үлгән. Ул егылган чакта колясканы этеп җибәреп, баланың гомерен саклап калгандыр, мөгаен. Күрше ир-ат подъездда баскыч тоткасына орына, һәм аны да көчле итеп ток суга.
Ир баланы алып чыгып, машинасына куя, «ашыгыч ярдәм» чакыра. Табиблар пенсионер хатынга ярдәм итә алмый инде. Сабый исән, аңа зыян килмәгән.
Белгечләр фаҗига килеп чыгуда ишегалдында балалар мәйданчыгы ясаучы эшләр гаепле дип шикләнә. Алар подъездга үткәргеч сузган, аны электрощитка тоташтырганнар. Пандус шушы үткәргечне кыскан һәм фаҗига килеп чыккан булуы ихтимал, диелә хәбәрдә.
Моңа кадәр биредә яшәүчеләр әлеге үткәргечкә абынган, ток сугудан куркып зарланганнар.
Җинаять эшен тикшерү бара, диелә хәбәрдә.