Биш яшьлек кызы белән югалган Башкортстан хатыны табылды: икесе дә үлгән
Башкортстанда яшәүче хатын һәм аның 5 яшьлек кызы Пермь краенда югала. Аларны бер атна чамасы эзлиләр. Хәзер аналы-кызлы бу кешеләрнең мәетләре табылган. «Башинформ» агентлыгы Ирина Буханова исемендәге эзләү отрядына сылтама белән шул хакта хәбәр итте.
«Табылдылар. Һәлак булганнар», – диелә хәбәрдә, өстәмә белешмә бирелми.
«КП-Пермь» мәрхүмнәрнең туганнарына сылтама белән хәбәр иткәнчә, якынча белешмә буенча, ана белән баланы үтергәннәр, мәетләрен бер бистәдә тапканнар.
«Миңа тикшерүчеләр шалтыратты, аларны ниндидер бер бистәдә үле килеш табуларын әйттеләр. Аларны үтергәннәр, җинаять аеруча катлаулы, җинаятьчене тотканнар, диделәр, башка берни дә белмим», – дигән мәрхүмнәрнең туганы.
Моңа кадәр «Башинформ» хәбәр иткәнчә, Ишембай шәһәрендә яшәүче 45 яшьлек хатын 5 яшьлек кызы белән бергә Пермьдә кунакта була. 18 августка каршы төндә алар кунактан кайтып китә һәм югала, диелә хәбәрдә.