Нинди авыруларны мәҗбүри медицина иминияте программасы ярдәмендә дәвалап булмый?

Җенси юл белән күчә торган авырулар, туберкулез, ВИЧ һәм СПИД мәҗбүри медицина иминияте (ОМС) программасы буенча дәваланмый. Бу хакта Бөтенроссия иминиятчеләр берлеге башлыгы Евгений Уфимцев сөйләде, дип яза РИА Новости.

«Бүген мәҗбүри медицина иминияте программасына җенси юл белән күчә торган авыруларны, иммунодефицит вирусын, СПИДны, туберкулезны, үз-үзеңне тотуда тайпылышларны һәм кайбер башка авыруларны дәвалау керми», – дигән Уфимцев.

Аның сүзләренчә, бушлай медицина ярдәме күрсәтелә торган авырулар һәм халәтләр исемлеге ел саен билгеләнә һәм бушлай медицина ярдәме дәүләт гарантиясе программалары составында төзәтмәләр кертелә.

«ОМС системасы – медицина ярдәменең минималь кирәкле күләменең социаль гаранты. Ул теләктәшлек һәм тормыш өчен мөһим ярдәм принципларында төзелгән», – дип аңлатты ул.

«Медицина мәҗбүрияте» яки стандартлар кысасыннан чыккан очраклар кешенең шәхси җаваплылыгына һәм финанславына, ягъни, түләүле хезмәтләр яки ирекле медицина иминияте ярдәмендә дәвалануга күчә, дип йомгаклаган ул.

Бу авырулар вакытында медицина ярдәмен кайбер очракларда пациентлар түләүсез алырга мөмкин, әмма мондый хезмәтләр ОМС системасы хисабына түгел, ә федераль һәм төбәк бюджетлары акчаларыннан дәүләт сәламәтлек саклау системасы кысаларында финанслана.