Төрөттөн кийин майып болуп калган келин боюнча териштирүү уланууда
Назгүл Озконбаева быйыл январда Бишкектеги №4 Төрөт үйүндө төртүнчү баласын кесарево жолу менен төрөгөн. Операция учурунда ичегиси жабыркап, андан бери эки жолу Улуттук хирургия борборунда дарыланган келин 29-июнда ошол эле оорукананын ириң бөлүмүнө денеси ысып, кыйналган абалда жаткырылган.
Аталган борбордун башкы дарыгери Таалай Акматов 30-июнда “Азаттыкка” билдиргендей, келинге пневмония диагнозу коюлду. Акматов буга чейин Озконбаеванын ичегисинин 20-30 проценти алынганын, бирок өмүрүнө коркунуч жок экенин, себеби ички органдары кадимкидей иштеп жатканын, азыр пневмония болуп калганын билдирди:
“Тамак ичип жатат, дааратканага барып жатат, ичегиси жакшы иштеп жатат. Азыр өпкөсү проблема болуп калыптыр. Өзү менен сүйлөштүм. Маанайы жакшыраак. Бүгүн жеңилдеп калдым дейт. Операция жасабайбыз, дары менен эле дарылайбыз. Абалы орточо оор. Консилиум өткөрдүк, жыйынтыгында пневмония деген бүтүмгө келдик. Өпкөсүн дарылап жатабыз. А ичегиси жакшы эле”.
Келин Төрөт үйүндөгү дарыгерлердин шалаакылыгынын курмандыгы болуп, майып болуп калганын, тийиштүү мекемелерге жазган арыздарынан майнап чыкпай жатканын, ал азыр дарыгерлердин тыкыр көзөмөлүнө, психологиялык жардамга муктаж экенин “Кылым шамы” укук коргоо борбору билдирүүдө.
“Мамлекет аракет кылышы керек да өз жараны үчүн. Бул келин өзүн өзү кесип алган жок да”, - деди “Кылым шамынын” жетекчиси Гүлшайыр Абдирасулова.
Келиндин маселеси 24-июнда Бишкек шаардык кеңешинин атайын комиссиясында каралып, шаардык прокуратурага жана Саламаттык сактоо министрлигине кат жөнөтүлгөн. №4 Төрөт үйүнүн операция жасаган дарыгерлерине каршы арыз Октябрь райондук милициясында каттоого алынып, кийин тергөөчүлөр "кылмыш курамы жок" деген негизде териштирүүнү токтотуп коюшкан. Андан соң жабыркаган тарап шаардык милицияга кайрылган. (RK)