ХИТОЙДА КОРОНАВИРУС ҚУРБОНЛАРИ СОНИ 213 КИШИГА ЕТДИ…
Шу ҳақда Хитой соғлиқни сақлаш вазирлиги расман маълум қилган. Ўлим топганларнинг асосий қисми Ухань шаҳрига тўғри келади. Вирус юқтирганларнинг умумий сони 9 692 кишини ташкил этган. 187 киши худонинг қудрати билан хасталикни енгиб меъёрий ҳаётга қайтди.
Олимларнинг гапига кўра, вируснинг тарқалиш тезлиги 2002-2003 йилдаги пневмония балоси тарқалишидан пастроқ. Ўлганлар ҳам ўша йиллардагига нисбатан камроқ. 31 январдан бошлаб Пекин шаҳридаги метрога тушганларнинг ҳар бири тиббий кўрикдан ўтказилмоқда. Бунда асосан йўловчиларнинг тана ҳарорати ўлчаб кўрилмоқда.
Коронавирус Америкага ҳам етиб борган. Бундан ташқари, Германия, Франция, Италия, БАА, Австралия, Япония ва Сингапурда ҳам коронавирус юқтирганлар йўқ эмас. Вирус туфайли дунёнинг кўзга кўринган авиакомпаниялари босқичма-босқич самолётлар парвозини чеклашга ўтган. Россия ҳам Хитойга ўтиш, уёқдан мамлакат ичкарисига киришни чегаралаб қўйди. Америка ҳукумати ўз фуқароларига мурожаат этиб, Хитойга бормасликни маслаҳат бермоқда. Хитойдаги америкалик дипломатлар ватанга қайтиш ҳаракатига тушган.
Бугуннинг ўзида ҳисоб-китобларга кўра Тайландда 14, Гонгконгда 12, Японияда 11, Сингапурда 10, Австралияда 9, Тайванда 9, Малайзияда 8, Макаода 7, Жанубий Кореяда 6, Америкада 6, Францияда 5, Германияда 4, БАА да 4, Канадада 6, Италияда 2, Вьетнамда 2, Камбоджа, Финляндия, Ҳиндистон, Непал, Филиппин, Шри-Ланкада 1 киши коронавирус юқтирган.