Шимолий Корея АҚШга таҳдид қилди
Шимолий Корея АҚШни ҳаво ҳудудини бузганликда айблаб, Пхеньян Американинг разведкачи самолётини уриб туширишга ҳақли эканини эслатди. Бу ҳақда Корея марказий телеграф агентлиги мамлакат мудофаа вазирлигига таяниб, хабар берди.
Вазирлик маълумотларига кўра, АҚШ ҳарбий-ҳаво кучларининг стратегик ва электрон разведка самолётлари КХДР ҳаво ҳудудига бир неча ўн километр бостириб кирган. Вазирлик 1969 йилда Шимолий Корея осмонида Американинг EU-121 самолёти қандай уриб туширилганини эслатиб ўтди ва ҳаво ҳудуди қайта-қайта бузилган тақдирда “шунга ўхшаш ҳодисалар”ни истисно этмади.
Бундан ташқари, КХДР АҚШни Жанубий Кореяда стратегик ядро қуроллари ва ядроли сувости кемаларини жойлаштириш режалари билан яриморолда кескинлик қўзғатишда айблади.
“Бу Корея яриморолидаги вазият АҚШнинг провокацион ҳарбий ҳаракатлари туфайли ядро урушига яқинлашаётганини яққол исботлайди”, — деб таъкидлади Мудофаа вазирлиги.
Шимолий Корея ядро уруши хавфи ва унга тайёрлигини бир неча бор эълон қилган. Ўтган йилнинг кузида Пхеньян душман ҳужуми содир бўлган тақдирда ёки мамлакат ва унинг етакчиси Ким Чен Инга таҳдид туғилса, автоматик равишда ядровий зарба бериш ҳақидаги қонунни қабул қилганди. Шу билан бирга, Шимолий Корея ўзини масъулиятли ядровий давлат деб эълон қилди.
АҚШ президенти Жо Байден агар КХДР АҚШ ёки унинг иттифоқчиларига ядровий ҳужум уюштирса, Шимолий Кореядаги сиёсий режим барҳам топишини айтди.