«Жаспер» циклони Австралияда бир қанча аҳоли пунктларини сув босди
Австралия шимоли-шарқидаги Квинсленд штатида содир бўлган «Жаспер» тропик циклони туфайли бир қанча аҳоли пунктлари сув остида қолди.
ABC News телеканалининг Квинсленд ҳукумати расмийларига таяниб хабар беришича, сув тошқини туфайли кўплаб аҳоли пунктлари, жумладан, Иннисфейл ва Куктаун шаҳарлари электр таъминотисиз қолган, озиқ-овқат захиралари тугаб қолган.
Кучли ёмғирдан кейин баъзи дарёлар ўз ўрнидан тошиб, турар-жой биноларини сув босди. Юзлаб австралияликлар хавфсизроқ ҳудудларга эвакуация қилинишини кутмоқда, дейилади ҳисоботда.
Маҳаллий аҳолидан бири бедарак йўқолганлар рўйхатида. Қидирув-қутқарув ишлари давом этмоқда.
Собиқ шаҳар мери Десмонд Теилли АБC Неwс телеканалига маълум қилишича, ҳукумат кексалар ва ногиронларнинг аҳволидан жиддий хавотирда. Унинг сўзларига кўра, тимсоҳлар маҳаллий аҳоли учун катта хавф туғдиради.
Австралия бош вазири Энтони Албанезе табиий офатдан жабр кўрганларга моддий ёрдам кўрсатилишига, ишидан айрилганлар эса тўловни олишига ишонтирди.
Тўфондан сўнг дарҳол бошланган қидирув-қутқарув ишлари натижасида 300 дан ортиқ одам ҳудуддан эвакуация қилинди.
Квинсленд полицияси бошлиғи Катарина Керроллнинг айтишича, табиий офат оқибатида ҳалок бўлганлар ёки жиддий жароҳатланганлар ҳақида ҳозирча маълумот йўқ, бироқ баъзи аҳоли эвакуация қилиш учун томларида кутишмоқда.
Кернс халқаро аэропортида бир нечта самолётлар сув остида қолгани аввалроқ хабар қилинган эди.