Баш табиблар һәм мәктәп директорларының хезмәт хакын чикләргә тәкъдим иттеләр

«Гадел Россия – Дөреслек өчен» партиясе лидеры, Дума фракциясе башлыгы Сергей Миронов Премьер-министр Михаил Мишустинга баш табиблар һәм мәктәп директорларының хезмәт хакын чикләү тәкъдиме белән мөрәҗәгать юллаган. Аның фикеренчә, аларның хезмәт хакы хезмәткәрләренекеннән 2 тапкырдан да артып китмәскә тиеш. Документ РИА Новости карамагында бар.

«Ведомствога буйсынган барлык дәрәҗәдәге медицина һәм мәгариф оешмалары өчен махсус кагыйдә билгеләү мәсьәләсен карарга кирәк: җитәкченең хезмәт хакы учреждениедәге уртача хезмәт хакыннан 100 проценттан артмаска тиеш», – диелгән хатта.

Миронов РИА Новости белән әңгәмәдә билгеләп үткәнчә, 100 процент чик – җитәкченең югары җаваплылыгын бәяләү өчен җитәрлек өстәмә, юридик һәм икътисади яктан аны персоналның хезмәт хакына бәйләргә кирәк.

Җитәкченең үз-үзен бүләкләү күләме шәхси стимуллаштыручы түләүләргә түгел, ә коллективның уртача хезмәт хакын арттыруга бәйле булырга тиеш, дип ышана партия лидеры.

«Хәзерге вакытта барысы да киресенчә килеп чыга: җитәкче күп ала, аңа үзенә төрле премияләр язарга рөхсәт ителә, ә хезмәткәрләрнең хезмәт хакы хәтта өстәмә түләүләрне исәпкә алып та зур түгел. Шуның аркасында без җитәкчелекнең һәм гади персоналның хезмәт хаклары арасында зур аерма күзәтәбез», – дип өстәде ул.

Миронов фикеренчә, әлеге күренеш гади табиблар, шәфкать туташлары, укытучыларның эшкә мотивациясен төшерә, һәм хезмәт өчен түләүнең мондый системасы хезмәткәрләрнең һөнәрдән китүенә сәбәпче була. «Шул сәбәпле мәктәпләрдә, поликлиникаларда һәм хастаханәләрдә кадрлар кытлыгы сизелә», – ди сәясәтче.