Алмаз Мирзаянов: «Бер ае да тулмаган баланы калдырып йөрергә туры килә»

Иҗади гаилә Зөлфирә һәм Алмаз Мирзаяновларның икенче тапкыр әти-әни булулары хакында «Интертат» хәбәр иткән иде. Өйгә бәби кайтып, күңелле мәшәкатьләр башланып китсә дә, җырчы гаиләнең гастрольләр, концертлар графигында үзгәрешләр көтелми. Алмаз белән Зөлфирә тамашачыларын элеккечә үк яңа программа белән сөендерергә җыена. Чөнки нәни Мирзаянованы караучы ярдәмчеләре янәшәләрендә. Бу хакта «Интертат»ка Алмаз үзе сөйләде.

«Безнең әби (Зөлфирәнең әнисе Сәвия ханым) – башлангыч сыйныфлар укытучысы. Хәзер менә, эшен калдырып, тулысынча безнең балалар белән шөгыльләнә. Без концертларга әзерләнәбез. Иртән чыгып китәбез дә, көндез кайтып килеп, тагын чыгып китәбез. 1 ае да тулмаган баланы шулай калдырып йөрергә туры килә. Тик, эшебез шул булгач, кая барасың. Арбадан төшеп калып булмый.

«Акча җитмидер, өйләрендә ятсалар да булыр иде», – дип уйлаучылар да бардыр, бәлки. Аз гына ятып карасаң да, ничек артта калганың шунда ук күренәчәк. Чөнки безнең эшебез «больничный» ала торган эш түгел. Ярый Зөлфирәнең декрет ялы бар, ул безнең оешмада рәсми рәвештә эшли. Шуңа да карамастан, мин декретта, дип утыра торган түгел. Чөнки радио-телевидениеләргә еллык ротацияләр кертелгән.

Акчаны чыгару белән генә түгел, кире алырга да кирәк. Гаиләне тәэмин итәргә, үзебезнең һәм балаларыбызның киләчәген кайгыртырга, киләчәк иҗатыбызны да уйларга кирәк. Шуңа, өйдә карап торучыбыз булганда, эшлибез. Әбигә рәхмәт кенә. Няняга гомердә дә калдырып чыгып китә алмас идек», – диде Алмаз хәбәрчебезгә.