უმრავლესობაში არიან ადამიანები, რომლებმაც მოსამართლედ შეიძლება იუდა ისკარიოტელი დანიშნონ, თუ ამას პარტია უბრძანებს
უმრავლესობაში არიან ადამიანები, რომლებმაც მოსამართლედ შეიძლება იუდა ისკარიოტელი დანიშნონ, თუ ამას პარტია უბრძანებს, – ამის შესახებ დამოუკიდებელმა დეპუტატმა გედევან ფოფხაძემ ჟურნალისტებს უზენაესი სასამართლოს მოსამართლეების შერჩევის პროცესთან დაკავშირებით განუცხადა.
მისი თქმით, კანდიდატებს სწორად აქცენტირებული კითხვები უნდა დაესვათ და არა „ნახევარი კითხვები“, რომლებიც ” მათ გაპატიოსნებას ემსახურება”.
“მოსამართლეობის კანდიდატის მიერ კითხვისგან გაქცევა არის მოსახლებისგან გაქცევა, მცდელობა იმისა, რომ დაემალოს ხალხის აზრს და მოსაწონი იყოს მურუსიძე-ჩინჩალაძის ჯგუფისთვის. მგონია, რომ გვაქვს ამის რესურსი და შესაძლებლობა, რომ დავსვათ სწორად აქცენტირებული კითხვები და არა ნახევარი კითხვები, რომლებიც კანდიდატების გაპატიოსნებას ემსახურება. სიღრმისეულად უნდა დაისვას კითხვები იმ მიზნით, რომ ბოლომდე გამოაშკარავებული იყოს როგორც კვალიფიკაცია, ასევე მორალური ღირებულებები.
“ქართულ ოცნებაში” გამოკვეთილი, მორჩილი უმრავლესობა რომ არის, ფაქტია. იქ არიან ადამიანები, რომლებისთვისაც ეს საკითხი საერთოდ არ არის პრინციპული.
მათ მოსამართლედ შეიძლება იუდა ისკარიოტელი დანიშნონ, თუ ამას პარტია უბრძანებს,” – განაცხადა გედევან ფოფხაძემ.