თუ ოპოზიცია არ დაეთანხმება ცვლილებებს და თავისი პირობები ექნება, ეს რისკის ქვეშ აყენებს პროპორციულ არჩევნებთან დაკავშირებით საერთო შეთანხმებას
თუ ოპოზიცია არ დაეთანხმება ცვლილებებს და ექნება თავისი პირობები, ეს რისკის ქვეშ აყენებს საერთო შეთანხმებას და გადაწყვეტილებას პროპორციულ არჩევნებთან დაკავშირებით, – ამის შესახებ პარლამენტის თავმჯდომარემ არჩილ თალაკვაძემ 2020 წლის არჩევნებზე ბლოკების დაშვების თაობაზე ოპოზიციის მოთხოვნის საპასუხოდ განაცხადა.
პარლამენტის თავმჯდომარემ ხაზი გაუსვა, რომ კონსტიტუციაში პროპორციული არჩევნების ჩატარების თარიღის ცვლილებას, მხოლოდ „ქართული ოცნების“ უმრავლესობის ხმები არ ეყოფა და ცვლილებებს მხარი ოპოზიციამაც უნდა დაუჭიროს.
“ერთი წლის წინ „ქართულმა ოცნებამ“ მიიღო ისტორიული გადაწყვეტილება და ამ ცვლილებების ფარგლებში ჩვენ მხარი დავუჭირეთ პროპორციულ საარჩევნო სისტემას. ის უკვე არის ჩაწერილი დღევანდელი კონსტიტუციის ტექსტში. დღეს მსჯელობა მიმდინარეობს თარიღის შეცვლასთან დაკავშირებით, რაზეც მოგეხსენებათ, რომ მხოლოდ „ქართული ოცნების“ უმრავლესობის მხარდაჭერა არ იქნება საკმარისი პარლამენტში. ამას სჭირდება ხმების სამი 3/4 და ძალიან მნიშვნელოვანია, რომ ოპოზიციამაც მხარი დაუჭიროს პარლამენტში ამ ცვლილებას. მხოლოდ ამ შემთხვევაშია შესაძლებელი რომ პროპორციული არჩევნების თარიღთან დაკავშირებით ცვლილება დამტკიცდეს. თუ ოპოზიცია არ დაეთანხმება ამ ცვლილებებს და ექნება თავისი პირობები, ეს რისკის ქვეშ აყენებს საერთო შეთანხმებას და გადაწყვეტილებას პროპორციულ არჩევნებთან დაკავშირებით. ამიტომ მე დიდი იმედი მაქვს, რომ კენჭისყრის დროს იქნება საერთო აზრი და საერთო მხარდაჭერა დაფიქისირებული. რაც შეეხება სხვადასხვა საკითხებს, რომლებიც მოქალაქეებმა საჯარო განხილვების დროს გამოთქვეს, ეს იყო რეგიონების წარმომადგენლობის, თვითმმართველობის, ბლოკების, ბარიერთან დაკავშირებული საკითხები, ეს ყველაფერი ჩვენ საჯარო განხილვების დროს შევაჯამეთ. ამაზე პასუხები გვქონდა როგორც ჩვენ, ისე ოპოზიციას და პროცესი უკვე გადმოსულია საპარლამენტო ფორმატში. წინ გვაქვს საკომიტეტო განხილვები და შემდეგ პლენარული სხდომები და იქ უკვე გამოჩნდება რა უფრო მნიშვნელოვანია ოპოზიციისთვის – ბლოკები, რომლმაც სამწუხაროდ, ბოლო წლების განმავლობაში, ქართულ პოლიტიკაში მიიღო საკმაოდ დამახინჯებული სახე, თუ ის მთავარი ცვლილებები, რომელსაც ჩვენ საზოგადოებას ვთავაზობთ”, – განაცხადა თალაკვაძემ.