დეკანოზი მამალაძე წარდგება სინოდის წინაშე და ყველაფერზე ექნება სალაპარაკო დრო – ძლივს მივიდნენ იმ დასკვნამდე, რომ არ შეიძლება უდანაშაულო ადამიანის ციხეში ყოფნა
დეკანოზი გიორგი მამალაძე წარდგება სინოდის წინაშე და აბსოლუტურად ყველაფერზე ექნება სალაპარაკო დრო,- ამის შესახებ დეკანოზ გიორგი მამალაძის ადვოკატმა მიხეილ რამიშვილმა „ინტერპრესნიუსთან“ წმინდა სინოდის მიერ მიღებული გადაწყვეტილების შეფასებისას განაცხადა.
მისი თქმით, „ამდენი ხნის განმავლობაში ძლივს მივიდნენ იმ დასკვნამდე, რომ არ შეიძლება უდანაშაულო ადამიანის ციხეში ყოფნა.“ ამასთან, როგორც ადვოკატმა განმარტა, ყველაფერი ის, რაც სათქმელია, ერთხელ და სამუდამოდ, უნდა გაცხადდეს.
კითხვაზე, რამდენად შეიძლება, წმინდა სინოდის გადაწყეტილება უკავშირდებოდეს იმას, რომ დეკანოზმა მამალაძემ საპატრიარქოს წინააღმდეგ კომპრომატების გამოქვეყნება დააანონსა, ადვოკატმა აღნიშნა, რომ დეკანოზი მამალაძე ამ ყველაფერს მხოლოდ წმინდა სინოდის წინაშე იტყვის.
„მას ჰქონდა ყოველთვის ერთი პოზიცია, რომ ის ამ ყველაფერს მხოლოდ წმინდა სინოდის წინაშე იტყვის“, – განაცხადა მიხეილ რამიშვილმა.
შეგახსენებთ, რომ საპატრიარქოში წმინდა სინოდის სხდომა გაიმართა. მეუფე პეტრეს ინფორმაციით, წმინდა სინოდი მსჯავრდებულ დეკანოზ გიორგი მამალაძის შეწყალების საკითხზე პრეზიდენტს შუამდგომლობით მიმართავს და ეს გადაწყვეტილება სინოდმა ერთსულოვნად მიიღო.