არავინ არსად შევარდნას არ აპირებს
თბილისის მერის კახა კალაძის განცხადებით, იმით, რომ კონკრეტულ აუდიოჩანაწერთან დაკავშირებით გამოძიება სწრაფად და დროულად დასრულდეს, უპირველეს ყოვლისა, ჟურნალისტები უნდა იყვნენ დაინტერესებულნი. ამის შესახებ კალაძემ ჟურნალისტებს “ტვ პირველთან” დაკავშირებით მიმდინარე მოვლენების კომენტირებისას განუცხადა.
“პირველი, რაც მინდა ვთქვა, ისაა, რომ კანონის წინაშე ყველანი ვართ თანასწორუფლებიანი. რაც შეეხება იმ კონკრეტულ საკითხს, პირველ რიგში, თქვენ უნდა იყოთ დაინტერესებულნი, რომ გამოძიება რაც შეიძლება სწრაფად და დროულად დასრულდეს კონკრეტულ აუდიოჩანაწერებთან დაკავშირებით. ამ თემაზე ბევრი განცხადება იყო გაკეთებული. ბევრი კონკრეტული საკითხი იყო გაზვიადებული. ასე რომ, არავინ არსად შევარდნას არ აპირებს, ამას სრული პასუხისმგებლობით გეუბნებით,” – განაცხადა კახა კალაძემ.
პროკურატურამ 9 მარტს გამოძიება დაიწყო კერძო საუბრის უნებართვო ჩაწერის ან/და მიყურადების, ასევე კერძო კომუნიკაციის ჩანაწერის, ტექნიკური საშუალებით მოპოვებული ინფორმაციის უკანონოდ გამოყენებისა და გავრცელების ფაქტებზე, საქართველოს სისხლის სამართლის კოდექსის 158-ე მუხლით გათვალისწინებული დანაშაულის ნიშნებით.
იმავე დღეს, პროკურატურის შუამდგომლობის საფუძველზე, თბილისის საქალაქო სასამართლოდან მიღებული იქნა განჩინება “TV პირველიდან” იმ ელექტრონული ინფორმაციის მატარებელი მოწყობილობის ამოღებაზე, რომელზეც დატანილი უნდა ყოფილიყო 6 მარტს “ნოდარ მელაძის შაბათის” რეპორტაჟში გამოყენებული კერძო საუბრების ამსახველი ჩანაწერები.
განჩინების იმ ნაწილმა, სადაც საუბარია იძულების პროპორციული ზომის გამოყენებაზე, პროტესტი გამოიწვია და მედიაზე მოსალოდნელ შეტევად შეფასდა