პრიგოჟინი: მოვუწოდებ რუსეთის ელიტას, მოკიდეთ ხელი თქვენს ნაბიჭვარ შვილებს და გაუშვით ომში
რუსული კერძო სამხედრო კომპანია “ვაგნერის“ დამფუძნებელმა, “პუტინის მზარეულად” წოდებულმა ევგენი პრიგოჟინმა ვრცელი ინტერვიუ მისცა უკრაინაში დაბადებულ პრორუს აქტივისტს და პოლიტტექნოლოგ კონსტანტინ დოლგოვს, რომელშიც განაცხადა, – რუსეთის მიერ უკრაინის “დენაციფიკაციისა და დემილიტარიზაციისთვის“ დაწყებულმა “სპეციალურმა სამხედრო ოპერაციამ“ მოიტანა სულ სხვა შედეგი, ვიდრე ეს მოსკოვს ეგონაო.
“ვაგნერის“ დამფუძნებელი ამბობს, რომ უკრაინის “დენაციფიკაციამ” გამოიწვია ის, რომ უკრაინა მთელმა მსოფლიომ გაიცნო, “დემილიტარიზაციის” შედეგად კი, დღეს უკრაინას მსოფლიოში ერთ-ერთი უძლიერესი არმია ჰყავს.
“მინდა დავუბრუნდე 1992 წელს, როცა ჩვენი მოძმე უკრაინა ცალკე სახელმწიფო გახდა. იმის ნაცვლად, რომ გაგვეგრძელებინა ჩვენი კავშირები, დიდად არ ვაქცევდით ყურადღებას, რა ტიპის იყო ჩვენი კომუნიკაცია. ამ დროს ამ პროცესში შემოძვრნენ ამერიკელები, ევროპელები, გამოჩნდა იუშჩენკო, ასევე რეგვენების მთელი წყება, რომლებიც ტრიალებდნენ მიხეილ სააკაშვილის უკან და ამღვრევდნენ წყალს. 2014 წელს მოხდა სამხედრო გადატრიალება, მაშინ უკრაინაში იჯდა დასრულებული დეგენერატი იანუკოვიჩი, რომელიც მარტო იმაზე ფიქრობდა, როგორ ეშოვა ფული, დაიწყო შიდა ელიტური დაპირისპირებები პროდასავლელებსა და პრორუსებს შორის… მოხდა მაიდანი, რუსები წავიდნენ ძირითადად დონბასში, ყირიმი გამოეყო. ამის მერე 8 წელიწადი რას ვაკეთებდით? იმის ნაცვლად, რომ დონბასისგან შეგვექმნა სამოთხე დედამიწაზე და გვეთქვა სომხეთისთვის, საქართველოსთვის, აზერბაიჯანისთვის, მოდით ჩვენთან, ჩვენთან საუკეთესოა, გაგვეკეთებინა თავისუფალი ეკონომიკური ზონა, მოგვეპოვებინა და გაგვეყიდა ქვანახშირი, ამის ნაცვლად იქ განამწესეს კურჩენკო, რომელმაც ყველაფერი მოიპარა, რის მოპარვაც შეიძლებოდა. მასთან წილში იყვნენ რუსები სამხრეებით თუ მათ გარეშე, პრეზიდენტის ადმინისტრაციის წარმომადგენლები და ა.შ. დონბასი გაქურდეს… ბევრი კითხვაა, რომელზეც მოუწევთ პასუხის გაცემა… ამის მერე, როგორც ჩვენ გვეუბნებიან, უკრაინელებმა დაიწყეს აგრესიისთვის მზადება, ეს არის, რასაც გვეუბნებიან, ამის დამადასტურებელი სხვა ინფორმაცია მე არ მაქვს. გამოაცხადეს სპეცოპერაცია… ჩვენ რა ვქენით, მივედით უკრაინაში თავხედურად, ნაცისტების ძებნაში მთელ ტერიტორიას ჩექმით გადავუარეთ, მივუახლოვდით კიევს, მაგრამ “ჩავისვარეთ“ და უკან დავიხიეთ, იგივე მოხდა ხერსონის შემთხვევაში და სხვა მიმართულებებითაც… რა იყო ამ სპეცოპერაციის მიზანი – დენაციფიკაცია და დემილიტარიზაცია და რა მივიღეთ? – დენაციფიკაციით უკრაინა ვაქციეთ ნაციად, რომელიც მთელ მსოფლიოში გახდა ცნობილი”, – განაცხადა პრიგოჟინმა.
რაც შეეხება “დემილიტარიზაციას“, პრიგოჟინის თქმით, თუ “სპეცოპერაციის“ დაწყებამდე უკრაინას დაახლოებით ჰქონდა 500 ტანკი, დღეს აქვს 5 000 და თუ ბრძოლა 20 000 ადამიანს შეეძლო, დღეს შეუძლია 400 000-ს. მისი განცხადებით, შედეგი საპირისპიროა – არა დემილიტარიზაცია, არამედ მილიტარიზაცია.
პრიგოჟინის თქმითვე, დღეს უკრაინელებს ჰყავთ ერთ-ერთი უძლიერესი, კარგად ორგანიზებული არმია, მომზადების მაღალი დონით, კარგი დაზვერვით, სხვადასხვა შეიარაღებით და ერთნაირი წარმატებით იყენებენ როგორც საბჭოთა, ისე ნატოს ნებისმიერ სისტემას.
მისივე თქმით, რუსეთის ხელისუფლების წარმომადგენლების ოჯახის წევრები დასავლეთსა და სხვა ქვეყნებში დადიან და დროს ატარებენ. მან ახსენა შოიგუს სიძე და ლავროვის ქალიშვილი. პრიგოჟინის თქმით, “ელიტის შვილები მაძღრად ცხოვრობენ და დროს ატარებენ”.
“მოვუწოდებ რუსეთის ელიტას, მოკიდეთ ხელი თქვენს ნაბიჭვარ შვილებს და გაუშვით ომში. როდესაც მათ დაკრძალავთ, ხალხი იტყვის, რომ სამართლიანობა აღდგა”, – თქვა პრიგოჟინმა.