Knut Arild Hareide blir ny direktør i Norges Rederiforbund

Norges Rederiforbund er ein arbeidsgivar- og interesseorganisasjon for norske reiarlag og offshoreselskap. Hareide går dermed frå stillinga som direktør for Sjøfartsdirektoratet til Rederiforbundet. Etter planen startar han i jobben 1. august.

– Eg gler meg til å ta fatt på spanande utfordringar i Rederiforbundet. Skipsfarten og den maritime næringa er ein verdsleiande aktør som skapar verdiar og arbeidsplassar langs heile kysten kvar einaste dag, seier Hareide i ei pressemelding.

Han tek over etter Harald Solberg, som blir ny administrerande direktør for Norsk Industri.

– Styret i Rederiforbundet er svært glade for at Hareide har takka ja til jobben. Hareide har ein unik politisk kompetanse med lang fartstid frå Storting og regjering, og har gjennom erfaringa frå Sjøfartsdirektoratet også veldig god kjennskap til skipsfarten og den maritime næringa, seier Harald Fotland, president i Norges Rederiforbund.