Fann ukjend mellomalderruin ved Selja

Arkeologar har avdekka til no ukjende ruinar frå mellomalderen berre 30 meter frå Selja kloster i Stad.

Forskarar har opna fleire sjaker nord og vest for klosterområdet. Her fann dei murverk og hellegolv frå ein steinbygning. Til no er det synleg ein ruin med to rom, men byggverket held fram under torva.

– Byggemåten tyder på høgmellomalder, og den førebelse hypotesen er at bygningen kan ha vore knytt til produksjon eller handverk i klostertida, forklarar arkeolog Regin Meyer.

Selja har fleire ruinar etter klosteret, bispesetet og helgenanlegget, som har vore gravne ut og forska på gjennom 200 år.