უკრაინამ გამოძიება დაიწყო ვიდეოს გამო, რომელზეც სამხედრო ტყვის მოკვლაა გადაღებული

უკრაინის გენერალურმა პროკურატურამ დაიწყო გამოძიება ინტერნეტში ბოლო ხანს გავრცელებულ ვიდეოჩანაწერის გამო, სადაც, სავარაუდოდ, რუსი სამხედროები კლავენ უკრაინელ სამხედრო ტყვეს. აღძრულია სისხლის სამართლის საქმე სამხედრო კანონებისა და წესების დარღვევისა და განზრახ მკვლელობის მუხლით.


ვიდეოჩანაწერი, რომელიც სოციალურ ქსელებში 9 ნოემბერს გავრცელდა, დიდი ალბათობით, დონეცკის ოლქშია გადაღებული. მასზე ასახულია რამდენიმე რუსი სამხედროს მიერ უკრაინელი სამხედროს დაკითხვა. უკრაინელი, როგორც ჩანს, ფეხში დაჭრილია და ასფალტზე წევს. მას იარაღი არ აქვს. ის ამბობს, რომ წარმოშობით სუმის ოლქიდან არის და რუსებს ეუბნება, რა მიმართულებით წავიდნენ უკრაინის შეიარაღებული ძალების დანარჩენი სამხედროები. ამის შემდეგ მას ავტომატიდან თავში სამჯერ გასროლით კლავენ.


გადაღების ზუსტი ადგილი და თარიღი უცნობია. ვიდეოს ინტერნეტში გავრცელებას გამოეხმაურა უკრაინის ადამიანის უფლებათა დაცვის სფეროში წარმომადგენელი, დმიტრო ლუბინეცი. მან დაწერა, რომ ამის შესახებ განაცხადებს წითელი ჯვრის საერთაშორისო კომიტეტსა და გაეროში. "ამაზე რეაგირება თუ არ მოხდა, დანაშაულები განმეორდება. დაუსჯელი ბოროტება ყოველთვის ბრუნდება", - განაცხადა ომბუდსმენმა.




7 ნოემბერს უკრაინის გენერალური პროკურორის სამსახურის წარმომადგენელმა, დენის ლისენკომ განაცხადა, რომ ამჟამად უკრაინაში მიმდინარეობს სისხლის სამართლის 49 საქმის გამოძიება ბრძოლის ველზე 124 ტყვე სამხედროს მკვლელობის ფაქტებზე. სამხედრო ტყვეების - ან მათი, ვინც ტყვედ ბარდება - მკვლელობა წარმოადგენს ომის მსხვერპლთა დაცვის შესახებ ჟენევის კონვენციის დარღვევას. სამხედრო ტყვეების სიცოცხლესა და ფიზიკურ ხელშეუხებლობაზე ძალადობის ნებისმიერი აქტი კლასიფიცირებულია, როგორც ომის დანაშაული.