ЕУ го поздрави укинувањето на санкциите против обвинителот на МКС

Европската унија го поздрави укинувањето на санкциите на Соединетите држави изречени од поранешниот претседател Доналд Трамп врз главниот обвинител на Меѓународниот кривичен суд.

„Овој важен чекор ја подвлекува посветеноста на САД кон системот заснован на меѓународните правила“, рече шефот на дипломатијата на ЕУ, Жозеп Борел кој дополни:

„МКС игра важна улога во доставувањето правда на жртвите на некои од најужасните злосторства во светот. Заштитата на непристрасноста и судската независност на МКС е најважна за неговата ефикасност и правилно функционирање “.

Изјавата беше издадена еден ден откако Соединетите држави ги укинаа санкциите за високи членови на Меѓународниот кривичен суд (МКС), вклучувајќи го и обвинителот кој започна истрага за наводни воени злосторства од  американскиот воен персонал во Авганистан.

Државниот секретар Антони Блинкен го најави потегот во вчерашната изјава , велејќи дека Министерството одлучило дека санкциите се „несоодветни и неефикасни“.

Санкциите беа изречени минатата година од поранешниот државен секретар Мајк Помпео и насочени кон обвинителот Фату Бенсуда и други вработени во судот. Помпео го обвини МКС со седиште во Хаг за повреда на националниот суверенитет на САД кога одобри истрага за воени злосторства, наводно, извршени од авганистански сили, талибанците или американските трупи.