Manchester City 2 illiyinə Avrokuboklardan uzaqlaşdırıldı.

Manchester City UEFA tərəfindən maliyyə feyr-pley qaydalarını pozduğu və istintaq prosesində kifayət qədər əməkdaşlıq etmədiyi üçün çox ağır şəkildə cəzalandırıldı. ONBİR Goal.com`a istinadən məlumat verir ki, qarşıdan gələn iki il ərzində Manchester City İngiltərə Premyer-Liqasında Avrokuboklara vəsiqə təmin edən yer tutmasından asılı olmayaraq qitəmiqyaslı yarışlarda iştirak edə bilməyəcək və bununla yanaşı İngilis klubu 30 milyon avro dəyərində cərimə ödəyəcək. Komandanın Tribunal Arbitral du Sport`a (CAS) apelyasiya ilə əlaqəli müraciət etmək haqqı var və klubdan verilən rəsmi bəyanata görə ən qısa müddət ərzində şəhərlilər bu haqqından yararlanacaq.

Zatən, “Şəhərlilər”in bu sezondakı nəticələri ürəkaçan deyildi. Premier-League`də çempionluq ümidlərini, demək olar, itirən Manchester City çempionatın lideri Liverpool`dan 22 xal geridədirlər. Çempionlar Liqasında isə püşkatmada bəxtlərinin gətirdiyini demək namümkündur, çünki 1/8 finaldakı rəqibləri İspaniya nəhəngi Real Madrid`dir və son zamanlar inamlı təsir bağışlayan “Kral Klubu” hal-hazırda İspaniya La Liqa`sına başçılıq edir.

Artıq neçə aydır ki, baş məşqçi Josep Guardiola`nın bu mövsüm bitəndən sonra Manchester City`dən gedə biləcəyi müzakirə olunurdu. Guardiola`nın əvvəlki açıqlamalarından birində sezonun axırından sonra 100 faiz qalacağını ifadə etsə də, UEFA`nın bu qərarı hadisələrin müqəddəratını köklü şəkildə dəyişə bilər. Qeyd etmək lazımdır ki, komandanın idman direktoru Txiki Begiristain və Josep Guardiola bu yay transfer pəncərəsi ərzində komandada restorasiya işləri aparmağı planlaşdırırdılar. Artıq “Şəhərlilər”in yeni futbolçuları öz sıralarına necə cəlb edəcəyi və ələlxüsus öz ulduz futbolçularını komandada saxlaya bilib-bilməyəcəyi böyük maraq doğurur.