Sumqayıt`ın baş məşqçisi: Biz çempion olmalı idik?
Sumqayıt Azərbaycan Premyer Liqasının ilk turu çərçivəsində səfərdə qarşılaşdığı Keşlə`ni 2 cavabsız qolla məğlub edib.
ONBİR qonaq komandanın baş məşqçisi Ayxan Abbasovun görüşdən sonra təşkil edilən mətbuat konfransındakı sözlərini təqdim edir:
– İlk oyundan sonra hansı çatışmazlıqları gördünüz və rəhbərlikdən yeni oyunçu istəyəcəksinizmi?
– Bizdə hər mətbuat konfransında transferlə bağlı sual vermək dəb halını alıb. Ala bilsək, alacağıq, ala bilməsək, bu oyunçularla yolumuza davam edəcəyik. İstərdim, desinlər ki, Ayxan müəllim, təbrik edirəm, Konfrans Liqasında 3 gənc oyunçu oynatdınız. Bəzi dırnaqarası “professorlar” deyir ki, Cukaricki`ni keçməli idiniz. Bizim də 11-12 legionerimiz olsaydı, o zaman nəsə demək olardı.
– Sumqayıt son vaxtlar Keşlə`yə yeganə məğlubiyyəti ölkə kubokunun finalında alıb. Bu, həmin görüşün məsuliyyətindən qaynaqlanırdı?
– Əlbəttə. Həmin gün Keşlə bizdən daha istəkli oldu. Rəqibə heç bir məqamda uduzmadıq. Belə matçlarda bəzi futbolçular üzə çıxmalıdırlar. Rəqibdə Sezar Meza Kolli kimi futbolçu var idi. Bizdə bu gün Rəhim Sadıxov bu funksiyanı icra edir. Bizdə o, Əli Qurbani belə məqamlarda üzə çıxmağa başlayırlar.
– Belə düşüncə var ki, komanda çempion ola bilməyibsə, problem var. Ötən mövsümdən fərqli cari çempionatda hansısa dəyişikliklər etmisiniz?
– Biz çempion olmalı idik? Mən bu fikirlə razı deyiləm. Bu sualı iddialı klublara vermək olar. Bizi çempionluğa iddialı görürsünüzsə, çox sağ olun. Heyəti qorumaqda məqsədimiz budur ki, futbolçular daha çox oynamalıdırlar. Çempionatımız çox çətindir. Heyət geniş olmalıdır. 1-3 məğlubiyyətlə deyə bilmərsən ki, komanda hazır deyil. Bizim məqsədimiz fərqlidir. Avropaya, güclü komandalara oyunçular vermək istəyirik. Xəyal Nəcəfovun Neftçi`yə gedişi bizə pul qazandırdı. Həmin pulla işlər görüldü. Çempion olmaq üçün nələr-nələr lazımdır. Bəzi liqalarda sürpriz çempion olur. Məsələn, Leeds kimi. Amma növbəti mövsüm görürsən ki, bu, çempionluq komanda deyil.
– Rəhim Sadıxovun adı Qarabağ`la hallanır. Bununla bağlı təklif almısınız?
– Xeyr, bizə təklif olmayıb. Onu satmaq fikrimiz yoxdur. Gərək elə təklif olsun ki, fikrimizdən daşındıra bilsinlər.
(apasport.az)