Июнь ойида Ўзбекистон миллий жамоаси мураббийлар штаби истеъфога чиқарилгач, қарийб икки ой давомида янги номзодларни кўриб чиққан Ўзбекистон футбол ассоциацияси ўтган ҳафтада словениялик Сречко Катанец миллий жамоа бош мураббийи сифатида иш бошлаши ҳақида маълум қилганди. Tribuna.uz мухбири миллий жамоамиз собиқ бош мураббийи Вадим Абрамов билан суҳбатлашиб, словениялик мутахассис борасидаги фикри, ўйин услуби, Купер билан ўхшашликлари ва янги мураббийга қандай маслаҳат бера олиши ҳақида сўради. - Вадим Карленович, сиздан кейин миллий жамоани Сречко Катанец бошқариши маълум қилинди. Сиз словениялик мутахассиснинг жамоаларига қарши ўйнагансиз, унинг иши ва ўйин услуби ҳақида қандай фикрдасиз? - Бу мураббийнинг аввалги ишларига мен томонимдан баҳо берилиши менимча нотўғри бўлади. Мен билган ягона нарса шуки, Ироқ миллий жамоаси Катанец қўл остида ҳимоядан ўйин ташкил этарди. Фикримча, у бизда ҳам ўйинни ҳимоядан ташкил этади. Унинг аввалги жамоаларидаги натижалари мендан кўра сизларга яхшироқ маълум бўлса керак. Чунки унинг Осиё жамоаларидаги натижасини кузатганим йўқ. Унинг ягона муваффақияти сифатида қачонлардир Словения миллий жамоасини Европа ва жаҳон чемпионатига олиб чиққанини биламан. Ундан кейинги натижаларини кузатганим йўқ. - Ҳар ҳолда Катанец жамоасига қарши ўйинларни эсласангиз керак? - Унинг жамоаларига қарши икки марта ўйнаганман. Ироқ билан 2020 йил БААда ўртоқлик ўйини ўтказдик. Ўшанда нисбатан ёшартирилган таркиб тўп сурганди. Ўйинда ҳисобни очган бўлсак-да, икки хатомиз иккита голга сабаб бўлиб ютқазгандик. Тошкентда ҳам март ойидаги ўйинда (Ўзбекистон – Ироқ 0:1) устунлик қилиб, минимал ҳисобда ютқазгандик. Буни изоҳлаш қийин. Икки марта ҳам ютган экан, демак у яхши мутахассис. - Ушбу баҳсларда Катанец жамоасининг ўйинини ўрганган бўлсангиз керак. У кўпроқ қайси жиҳатларга эътибор қаратади? - Ҳа, рақиб ўйинларини ўрганганмиз. Унинг қўл остида Ироқ миллий жамоаси ҳар доим қарши ҳужумга таяниб, ўйинни ҳимоядан қурган. Бизга қарши баҳсларда ҳам қарши ҳужумда қочиб, гол уришган. Биз эса ўз имкониятларимиздан фойдалана олмаганмиз. Унинг қўл остида улар доим шундай ўйнашган. Эҳтимол, у қўл остидаги таркибдан келиб чиққан ҳолда шундай тактика танлагандир. - Миллий жамоамизнинг сиздан аввалги мураббийи Купер ҳимоявий ўйин кўрсатган ва сиздан кейинги мураббий Катанец ҳам кўпроқ ҳимоядан ўйинни ташкил этган. Мутахассис сифатида айтингчи, бу мураббийларнинг ўйин услубида яна қандай ўхшашликлар бор, футболга қараши нуқтайи назаридан? - Очиғи, бу ҳақда бирор нарса дейиш қийин. Ўйлайманки, исталган мураббий янги жойда иш бошласа, у қўл остида қандай футболчилар йиғилишдан келиб чиқиб тизимни ва ишни йўлга қўяди. У футболчиларимиз билан қанча тез танишса, шунга қараб ўйин услуби, тактикани танлайди. Ҳар бир мураббий футболга нисбатан ўз қарашига эга, унинг нималарни ўйлаётгани ҳақида гапириш қийин, ўйиндан кейин эса гапириш осон. Шу боис кимнидир муҳокама қилиш менинг қоидаларимга зид. - Карленович, муҳокама қилишни эмас, футбол мутахассиси сифатида Купер ва Катанецнинг иш услубини, ўйин фалсафасини таққослашни сўраяпман... - Бу мураббийларнинг тактик машғулотларида қатнашсам, бу ҳақда гапирсам бўларди. Аввалги мураббийнинг қандай ўйин кўрсатгани, нимани кўзлаганини биламиз. У қарши ҳужумга таяниб, Шомуродов рақибларидан қочиб гол уришига умид қиларди. Аммо бу фақат маълум бир вақтда, маълум бир рақибга қарши ўйинда иш бериши мумкин. Узоқ муддат учун эса бу тактика иш бермайди. Шу боис сизга дарҳол айтишим мумкинки, ҳаммаси қўл остингизда қандай ўйинчилар йиғилишига боғлиқ бўлади. Ҳар қалай мен шундан келиб чиқардим. Қандай ўйинчилар бўлса, уларнинг кучли жиҳатларига таянган ҳолда тактика танлаш мумкин. - Миллий жамоамизда эса дарвоза ва ҳимоя чизиғи – нозиқ нуқталаримиз... - Ҳа, агар янги мураббий ўйинни ҳимоядан қурмоқчи бўлса ва биздаги муаммо дарвозабонлар ва марказий ҳимоячилар эканлигини инобатга олсак, у бу муаммога қандай ечим топа олади, менга қоронғу. Эҳтимол у бошқачароқ йўл топар, бу унга кўпроқ маълум. - Айталик, янги мураббий сиздан миллий жамоа масаласида қандайдир маслаҳат сўраса, таркиб борасида қандай муаммоларни айтган бўлардингиз? - Биринчидан, аминманки у мендан ҳеч нарсани сўрамайди. Иккинчидан, мен унга ҳеч қандай маслаҳат бера олмайман, унинг ўзи барчасини уддалай олишига ишонаман. Усмон Ибодов суҳбатлашди.
