Qarabağ 4:0 Neftçi – Məşqçi fikirləri

Azərbaycan Premyer Liqasının 9-cu turunda keçirilən Qarabağ – Neftçi matçı meydan sahiblərinin 4:0 hesablı qələbəsi ilə başa çatıb.

ONBİR qarşılaşmadan sonra baş məşqçilərin açıqlamalarını təqdim edir:

Qurban Qurbanov (Qarabağ): “Futbolçularımız çox yaxşı mübarizə apardılar. Bəzi texniki məqamlar çatmaya bilər. Amma ümumən futbolçulardan razıyam. Çox yaxşı komandaya qalib gəldik. Neftçi`nin yüksək bacarıqlı futbolçuları var. Bəlkə də, ən çətin oyunlarımızdan biri idi. Hesab asan göstərə bilər. Amma bu komandaya qarşı 90 dəqiqə diqqətli olmalıyıq, çox güc sərf etməliyik. Sona kimi gördünüz ki, gərgin oyun getdi, Neftçi də təslim olmurdu.

Azarkeş azaddır, onların öz düşüncələri var. Amma bizim azarkeşlərin hansısa komandanın baş məşqçisinə istefa şüarı səsləndirməsini istəmirəm. Hətta öz məşqçilərinə də bu şüarı səsləndirməsini istəmirəm.Xüsusən də, Samir Abasov haqda bunu demək xoş olmadı. Həmişə demişəm ki, hamıya hörmətlə yanaşmalıyıq”.

Samir Abasov (Neftçi): “Qarabağ`a məğlubiyyətdən sonra hissləri cılovlamaq mənə çətinlik yaradır. Oyuna pis başlamadıq. Hətta qol imkanımız da oldu. Kapitanımız 2 metrdən qapıya düşə bilmədi. Ardından itirdiyimiz top həlledici oldu. Həqiqətən də, keyfiyyətdə rəqibə uduzuruq. Səviyyə fərqi həddən artıq görünür. Bəzi məqamları bilirik. Boynuma da alıram ki, onları düzəldə bilmərik. Çünki bu vaxta kimi keçirdiyimiz oyunlar göstərir ki, balanssızlıq var. Bu, hücumlarımızdadır. Bunu hamımız bilirik, amma dəyişə bilməyəcəyik. O demək deyil ki, bütün görüşlərdə uduzacağıq. Matçı başqa səbəbdən uda bilirsən. Ard-arda buraxılan qollar bizi sındırdı.

Göz önündədir ki, Qarabağ güclənib. Bunda Neftçi`nin də rolu var idi. Ötən il Anton Krivotsyuk, Namik Ələskərov var idi, balans düzəlirdi. Bu mövsüm hansı yerlilərlə balans düzəldək? Bu gün yerli futbolçularımız avrokuboklara cavab vermirlər. Uduzmağımızın da səbəbi budur. Neftçi ən azı çempionluğa namizəddir, vuruşur. Hamı deyəcək ki, favorit Qarabağ`dır. Biz onlarla vuruşuruq. İnanmıram ki, hansısa yerli oyunçunu gətirsək, balansı düzəldər. Yalnız kimlərisə milliləşdirməklə vəziyyəti düzəldə bilərik. Çıxış yolunu bunda görürük”.

Qeyd edək ki, xallarının sayını 20-ə yüksəldən Qarabağ 1-ci pillədə qərarlaşır. Neftçi isə 17 xalla 2-ci pillədədir.