Dani Alves: Barcelona`nı layiq olduğu zirvələrə qaldıracağıq!

2016-cı ildə Barcelona`dan ayrılan və yenidən komandaya qayıdan Dani Alves`in təqdimat mərasimi keçirilib.

ONBİR 38 yaşlı oyunçunun mərasimdəki sözlərini təqdim edir:

“Buraya gələnədək prezidenti çox bezdirdim. Komandaya yenidən kömək edə biləcəyimi hər dəfə söyləyirdim. Barcelona`ya çox şey borcluyam. Xavi ilə telefonda danışdıq və komandanın gələcəyi ilə bağlı müzakirələr apardıq. Digər faktorlar, pul vacib deyildi. Barcelona`ya qayıtmaq vaxtım çatmışdı. Əgər Barcelona`dan zəng gəlsə və bu zəngdə “Sən qayıtmalısan” deyilsə, hər zaman hazır vəziyyətdə olmalısan. Barcelona`nı layiq olduğu zirvələrə qaldıracağıq!

Cari mövsümün sonunadək müqavilə imzaladıq. Bu müddətin uzadılıb-uzadılmayacağı mənim performansımdan asılıdır. Əgər gözləntiləri qarşılaya bilməsəm, təbii ki, məni bayıra atacaqlar (gülür). Ona görə də uzunmüddətli bir saziş bağlamadıq.

Təcrübələrimi gənc nəsilə ötürmək vaxtıdır. Bununla da həm bir-birimizə, həm də komandamıza kömək olacağıq. Komandanın uğuru, elə mənim uğurum deməkdir. Hər kəsə, hər bir komanda yoldaşıma hörmət edirəm. Etdiyim hər şey bu klubun, bu komandanın xeyri üçün olacaq”.