Tvilar på «epost frå Peng Shuai»
Den forsvunne tennisstjerna Peng Shuai skal ifølgje kinesiske medium ha sendt ei melding der ho seier at ho er heime og slappar av og har det bra.
Men presidenten i WTA, det internasjonale tennisforbundet for kvinner, tvilar sterkt på at meldinga er ekte.
«Eg er verken sakna eller utrygg. Alt er bra», står det i meldinga, som er omtala i det statlege engelskspråklege mediet CGTN.
Men WTA-president Steve Simon trur ikkje på det. Tvert i mot.
– Meldinga i kinesiske statlege medium gjer meg berre endå meir uroleg for henne og hennar tryggleik, seier Simon i ei fråsegn.
Han seier han har prøvd via mange kanalar å få kontakt med Peng, men utan resultat.
– Eg vil ha ei uavhengig stadfesting av at ho har det bra, seier Simon.
Shuai fortalde tidlegare denne månaden om at ho hadde blitt valdteken av ein tidlegare visepresident i Kina. I meldinga i dag står det også at skuldingane ho kom med, ikkje er sanne.
Etter at ho fortalde den historia, har ingen høyrt frå henne, noko som har skapt oppstyr i heile idrettsverda.