Аббосбек Файзуллаев борасида хавотирга ўрин йўқ!
Россия Премьер-лигаси клублари масумнинг иккинчи қисмига тайёргарлик кўрмоқда. Аксарият жамоалар қишки танаффусдан фойдаланиб, иссиқ ўлкаларда хорижий ўқув-машғулотлар йиғинларига киришган.
Аббосбек Файзуллаевнинг жамоаси – ЦСКА ҳам Бирлашган Араб Амирликлари ҳамда Туркияда кетма-кет учта йиғин ўтказади.
Машғулотларда асосий таркибнинг икки вакили – ўз мамлакатлари терма жамоаларига жўнаб кетган Аббосбек Файзуллаев ва бразилиялик легионер Келлвен иштирок этмайди.
Кўпчилик мухлису мутахассисларнинг жамоанинг етакчиси Аббосбек Файзуллаевнинг ЦСКА футболчилари билан тайёргарлик босқичини ўтамаслиги унинг ўйинларига қандай таъсир қилиши ўйлантириб қўйган.
ЦСКА бош шифокори Эдуард Безуглов бу масалага ойдинлик киритди.
- Ҳужумкор футболчи Аббосбек Файзуллаев ва ҳимоячи Келвеннинг ўқув-машғулот йиғинларида жамоа билан бирга эмаслиги уларнинг тайёргарлигига салбий таъсир кўрсатмайди.
Ҳозир Европанинг кўплаб мамлакатлари, хусусан Англия ва Испанияда бўлгани каби Россияда ҳам нуфузли халқаро мусобақаларда қатнашаётган ўз ўйинчиларини вақтинчалик йўқотиш ҳолати бор.
Барча кучли жамоаларнинг тақдири шундай ўзи.
Терма жамоалардаги мураббийлар штаби вакилларининг малакаси ва футболчиларнинг тажрибаси хотиржамлигимга асос бўлади. Улар жамоага қайтганда ҳам юқори спорт формасида бўлади. Қолаверса, миллий терма жамоадаги ўйинлари орқали оладиган ҳиссиётлари ҳам ижобий бўлишига умид қилиб қоламиз, - деди Эдуард Безуглов.
Аббосбек Файзуллаевнинг биринчи мураббийи Дмитрий Ан ҳам шогирдининг Ўзбекистон миллий терма жамоасидаги фаолияти Россия Премьер-лигасининг иккинчи қисмига пухта тайёргарлик кўришига тўсқинлик қилмаслигини таъкидлади.
- Мамлакатнинг бош терма жамоаси шарафини ҳимоя қилиш ҳар қандай футболчига доимо фахр-ифтихор бағишлайди. Бу футболчи олдидаги энг асосий вазифа.
Осиё кубогида қатнашиш Аббосбекка халақит қилмайди. Қолаверса, ЦСКАнинг жисмоний тайёргарлик бўйича мураббийлари жуда зўр. Файзуллаев формаси пасайган тақдирда ҳам улар футболчини тезда яхши ҳолатга келтира олади.
Мен Аббос баҳорда, яъни Россия Премьер-лигаси такланганидан кейин ҳам яхши ўйин намойиш қилади, деб ўйлайман, - деди Дмитрий Ан.
Эслатиб ўтамиз, Россия Премьер-лигасида қишки танаффус баҳоргача давом этади. Навбатдаги тур учрашувлари 1 март кунига белгиланган.
Аббосбек Файзуллаев ўтган йили август ойида ЦСКАга кўчиб ўтганидан буён чемпионат ва кубок доирасида жами 18 та учрашувда майдонга тушиб, ўз ҳисобига иккита гол ва тўққизта ассист расмийлаштирди.