Усмон Дембеле FIFA The Best мукофотини қўлга киритди

ПСЖ ҳужумчиси Усмон Дембеле FIFA томонидан йилнинг энг яхши футболчисига топшириладиган The Best мукофоти соҳибига айланди. Овоз бериш якунларига кўра, франциялик футболчи 2025 йилнинг энг кучли ўйинчиси деб топилди.

Шахсий соврин учун курашда Дембеле “Барселона” вакили Ламин Ямал ҳамда Мадриднинг “Реал” клубида тўп сураётган Килиан Мбаппедан устун келди. 28 ёшли ҳужумчининг бу ютуғи унинг ёрқин мавсумига мантиқий давом бўлди: у аввалроқ “Олтин тўп”ни ҳам қўлга киритган эди.

Дембеле 2024/25 йилги мавсумда ПСЖ сафида юқори даражада ўйнаб, кўплаб совринларни ютди ва 35 та гол муаллифига айланди.