Матвей Сафонов ПСЖнинг XXI асрдаги рекордини янгилади

Матвей Сафонов ПСЖ ва «Фламенго» ўртасидаги Қитъаларо кубок финалида ёрқин ўйин кўрсатди. Асосий вақт ҳам, қўшимча бўлимлар ҳам 1:1 ҳисобида якунлангач, ғолиб пенальтилар сериясида аниқланди.

Унда россиялик дарвозабон кетма-кет тўртта зарбани қайтариб, учрашув қаҳрамонига айланди. Opta статистика мутахассислари қайд этишича, Сафонов XXI асрда ПСЖ сафида ўйиндан кейинги пенальтилар сериясида тўртта пеналтани қайтарган илк дарвозабон бўлди.

Шу тариқа у Париж клубининг тарихида янги саҳифа очди. 2025/2026 йилги мавсумни Сафонов иккинчи рақамли дарвозабон сифатида бошлаган эди.

Бироқ сўнгги тўртта учрашувда айнан у майдонга тушди, ҳатто Лука Шевалье сафга қайтганидан кейин ҳам мураббийлар штаби Сафоновга ишонч билдиришда давом этди.