«Интер» «Динамо Загреб» ҳимоячиси Морис Валинчични кузатмоқда

Италиянинг «Интер» клуби Загребнинг «Динамо» жамоасида тўп сураётган қанот ҳимоячиси Морис Валинчични ўз сафига қўшиб олмоқчи. Бу ҳақда италиялик журналист Николо Скира ижтимоий тармоқларда хабар берди.

Манбага кўра, миланликлар Валинчични тўпиқ жароҳатидан тикланаётган Дензел Дюмфрисга муқобил вариант сифатида кўриб чиқмоқда. «Интер» қишки трансфер ойнасидаёқ «Динамо»га расмий таклиф билан чиқиши мумкин.

Жорий мавсумда Валинчич 14 та учрашувда майдонга тушиб, 2 та голли узатма муаллифи бўлган. Transfermarkt маълумотига кўра, футболчининг бозор қиймати 2 миллион еврони ташкил этади.