Transfermarkt Карим Бензема нархини яна пасайтирди

Transfermarkt мутахассислари Саудия Арабистони Про-лигаси клубларида тўп сураётган футболчиларнинг бозор қийматини қайта кўриб чиқди. Янгиланиш якунга кўра, «Ал-Иттиҳод» ҳужумчиси Карим Бензема баҳосидан 1 миллион евро йўқотди.

2022 йилда «Олтин тўп» соҳиби бўлган франциялик футболчи энди 7 эмас, 6 миллион еврога баҳоланмоқда. Бенземанинг сўнгги тўртта қайта баҳоланишида қиймат изчил камайиб борган: 10, 8, 7 ва ҳозир 6 миллион евро.

Бу, асосан, унинг ёши билан боғлиқ: Карим жума куни 38 ёшни қарши олади. Бенземанинг Transfermarkt'даги энг юқори бозор қиймати 2016–2017 йилларда қайд этилган бўлиб, ўшанда у 60 миллион еврога баҳоланган.