Гарри Кейн 2025 йилдаги энг ёқимли футбол онини айтди

Мюнхеннинг «Бавария» клуби ҳужумчиси Гарри Кейн 2025 йил давомида ўзи учун энг яхши футболий лаҳза қайси бўлганини маълум қилди. «Ўйлайманки, 2025 йилдаги энг ёқимли футбол оним Бундеслигадаги ғалаба бўлди.

Биринчи совринни, аниқроғи, фаолиятимдаги илк жамоавий трофейни қўлга киритиш ажойиб туйғу ва мен, жамоадошларим, шунингдек, дўстларим ҳамда оилам учун алоҳида лаҳза бўлди. Ишни охиригача етказганимиз жуда ёқимли бўлди», — деди Кейн.

Унинг сўзларини Goal портали Cleats Club’га таяниб келтирди. Ҳозирда «Бавария» Бундеслига турнир жадвалида пешқадам бўлиб турибди.

Мюнхенликлар иккинчи ўриндаги «РБ Лейпциг»дан саккиз очко олдинда. 21 декабрь куни йилнинг сўнгги ўйинида «Бавария» сафарда «Хайденхайм»га қарши майдонга тушади.