Винченсо Грифо “Фрайбург”нинг янги клуб рекордини ўрнатди

Германия Бундеслигасида йил якунидаги сўнгги тур — 15-тур учрашувлари бўлиб ўтмоқда. “Вольфсбург” ўз майдонида “Фрайбург”ни қабул қилди ва 3:4 ҳисобида мағлуб бўлди.

Меҳмонлар сафида голлардан бирига Винченсо Грифо муаллифлик қилди. У 56-дақиқада пенальти зарбасини аниқ ижро этди.

Бу гол Грифо учун Бундеслигадаги юбилей — 70-гол бўлиб, у “Фрайбург” тарихида чемпионатнинг юқори лигасида энг кўп гол урган футболчига айланди. Шу тариқа Грифо 69 гол билан иккинчи ўринда турган Нилс Петерсенни ортда қолдирди.

Кейинги турда “Фрайбург” ўз майдонида “Гамбург”га қарши ўйнайди. Учрашув 10-январ куни, янги йилда бўлиб ўтади.